ភ្ញៀវទេសចរទៅលេងខេត្តព្រះសីហនុនៅថ្ងៃបុណ្យអុំទូកឆ្នាំនេះ ថយចុះជិត ២៦ភាគរយ

2018-11-26 02:07:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីមន្ទីរទេសចរណ៍ខេត្តព្រះសីហនុ បានឲ្យដឹងថា ចំនួនភ្ញៀវទេសចរ ដែលចូលទៅទស្សនាខេត្តព្រះសីហនុ ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូកឆ្នាំនេះ បានថយចុះ បើប្រៀបធៀបឆ្នាំមុន។

អនុប្រធានមន្ទីរទេសចរណ៍ខេត្តព្រះសីហនុ លោក វ៉េង ស៊ីសុវង្ស ឲ្យដឹងថា ខេត្តនេះទទួលបានភ្ញៀវទេសចរសរុបប្រមាណជាង ៦ម៉ឺននាក់ ក្នុងនោះមាន ភ្ញៀវអន្តរជាតិជាង ១ម៉ឺននាក់ ថយចុះជិត ២៦ភាគរយ បើធៀបនឹងឆ្នាំ ២០១៧។

ភ្ញៀវទេសចរទៅកម្សាន្តនៅឆ្នេរមួយកន្លែងនៅខេត្តព្រះសីហនុ នាពេលកន្លងមក

លោក វ៉េង ស៊ីសុវង្ស ក៏បានឲ្យដឹងដែរថា សណ្ឋាគារ និងផ្ទះសំណាក់មួយចំនួនបានដំឡើងតម្លៃស្នាក់នៅ រយៈពេលបីថ្ងៃ នៃពិធីបុណ្យអុំទូក។ ចំណែកម្ហូបអាហារគ្រឿងសមុទ្រ ក៏ឡើងថ្លៃដែរ។

អភិបាលខេត្តព្រះសីហនុ លោក យន្ត មីន បានទទួលស្គាល់ថា ពិតជាមានករណីប្រតិបត្តិករទេសចរមួយចំនួន បានដំឡើងតម្លៃសេវាម្ហូបអាហារ និងដំឡើងតម្លៃសេវាស្នាក់នៅ កើនលើសថ្ងៃធម្មតាពិតប្រាកដមែន។

លោកបានអំពាវនាវដល់ប្រជាពលរដ្ឋ ពិសេសភ្ញៀវទេសចរជាតិអន្តរជាតិ ឲ្យបន្តចូលមកសម្រាកកម្សាន្តខេត្តឆ្នេរសមុទ្រមួយនេះ ឲ្យបានច្រើនថែមទៀតនាថ្ងៃខាងមុខ ជាពិសេសថ្ងៃបុណ្យឆ្លងឆ្នាំសកល២០១៨-២០១៩ ខាងមុខនេះ ដោយសារតែអាជ្ញាធរខេត្តបានកែប្រែហេដ្ឋារចនាសម្ព័ន្ធ និងបញ្ហាសន្តិសុខ។

លោក យន្ត មីន បានថ្លែងថា៖ «ខ្ញុំបានមានវិធានការចុះណែនាំ អប់រំដល់បងប្អូនប្រជាពលរដ្ឋ និងអាជីវករដែលប្រកបមុខរបរទទួលទានលើវិស័យសេវាកម្មទេសចរណ៍ មានសណ្ឋាគារ ផ្ទះសំណាក់ និងអាហារដ្ឋានជាដើម គឺឲ្យយកចិត្តទុកដាក់ទៅលើតម្លៃ ដើម្បីកុំឲ្យមានការប៉ះពាល់ដល់អារម្មណ៍ របស់ភ្ញៀវទេសចរ ទៅលើការដំឡើងតម្លៃសេវាខ្ពស់ពេក។ ប៉ុន្តែធ្វើម៉េចតម្លៃសេវាបម្រើទាំងនោះ គឺវារត់ទៅតាមតម្លៃទីផ្សារ ហើយលទ្ធភាពផ្គត់ផ្គង់ និងតម្រូវការទីផ្សារ គឺវាមិនដូចគ្នាទេ វាតែងតែមានការដំឡើងតម្លៃខ្លះៗពិតមែន។ នេះគឺជាឱកាសដែលបងប្អូនយើងត្រូវពិនិត្យមើលថា ការចូលមកទស្សនាខេត្តព្រះសីហនុ តើគួរស្នាក់នៅកម្សាន្តនៅតាមឆ្នេរខេត្តព្រះសីហនុ ឬមួយក៏ត្រូវបន្តចេញទៅកម្សាន្តនៅតាមបណ្ដាកោះនានា វាអាស្រ័យទៅលើបងប្អូនប្រជាពលរដ្ឋ និងភ្ញៀវទេសចរជាអ្នកសម្រេចចិត្ត ហើយរដ្ឋបាលខេត្តបានគាំទ្រ និងបានដាក់ពង្រាយកម្លាំងសមត្ថកិច្ចចម្រុះស្ថាប័នពាក់ព័ន្ធចុះការពារសន្តិសុខសុវត្ថិភាពជូនបងប្អូនដោយយកចិត្តទុកដាក់ ដោយមិនគិតថានៅលើដីគោក ឬដីកោះនោះទេ»។

កន្លងមក ពលរដ្ឋនិងសង្គមស៊ីវិលលើកឡើងថា ការកើនឡើងនៃចំនួនជនជាតិចិនរស់នៅក្នុងខេត្តនេះបណ្ដាលឲ្យភ្ញៀវទេសចរមិនសូវមកកម្សាន្តខេត្តនេះនោះទេ ដោយសារតែជនជាតិចិនទាំងអស់បង្កបញ្ហាអសន្តិសុខ៕

ប្រភព៖ Radio Free Asia ប្រែសម្រួល៖ សុខ សុវត្ថិ