លោកកឹម សុខា ប្រកាសមិនគាំទ្រសន្និសីទពិភពលោករបស់លោកសម រង្ស៊ី

2018-12-03 02:45:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមមេធាវីរបស់លោក កឹម សុខា អតីតប្រធានគណបក្សសង្គ្រោះជាតិ នៅថ្ងៃទី០២ ខែធ្នូ បានចេញសេចក្តីថ្លែងការណ៍ប្រកាសជំហររបស់ លោក កឹម សុខាថា មិនទទួលស្គាល់សន្និសីទរបស់ក្រុមលោក សម រង្ស៉ី នៅទីក្រុងអាត្លង់តា សហរដ្ឋអាមេរិក កាលពីថ្ងៃទី០១ ខែធ្នូនោះទេ។

មេធាវី៤រូបរបស់លោក កឹម សុខា បានគូសបញ្ជាក់ថា ទោះជាលោក កឹម សុខា ស្ថិតក្រោមការត្រួតពិនិត្យតាមផ្លូវតុលាការក៏ដោយ ក៏លោកនៅតែមានសិទ្ធិក្នុងការតវ៉ា ការពារ ទាមទារ និងបដិសេធ នូវអ្វីដែលប៉ះពាល់ដល់សិទ្ធិស្របច្បាប់របស់លោក។ លោក កឹម សុខា មានសិទ្ធិបញ្ចេញមតិដោយខ្លួនគាត់ផ្ទាល់ ឬតាមរយៈមេធាវីស្របតាមបញ្ញត្តិច្បាប់។

លោក សម រង្ស៊ី និងលោកកឹម សុខា (រូបភាពឯកសារ)

ក្រុមមេធាវីបានពន្យល់យ៉ាងដូច្នេះថា ជាសហមេធាវីដែលទទួលសិទ្ធិការពារក្តីជូន លោក កឹម សុខា គឺអនុវត្តស្របតាមក្របខណ្ឌវិជ្ជាជីវៈ តាមឆន្ទៈកូនក្តី និងមានការទទួលខុសត្រូវ។ ដូច្នេះក្នុងករណីសហមេធាវី បំពេញបេសកកម្មណាមួយ ដោយបំពានឆន្ទៈរបស់ លោកកឹម សុខា ដែលជាកូនក្តី លោកមានសិទ្ធិពេញលេញក្នុងការបញ្ឈប់បេសកកម្មក្រុមមេធាវី បានគ្រប់ពេលវេលា។

បន្ថែមលើសេចក្តីថ្លែងការណ៍ លោកកឹម សុខា តាមរយៈទំព័រហ្វេសប៊ុនរបស់លោក បានបញ្ជាក់យ៉ាងខ្លី អមជាមួយរូបភាពប្រជុំជាមួយក្រុមមេធាវីរបស់លោកថា លោកមានសិទ្ធិឱ្យមេធាវីនាំពាក្យ និងបង្ហាញពីឆន្ទៈរបស់លោក ដែលជាកូនក្តីជាផ្លូវការស្រប តាមបញ្ញត្តិច្បាប់។

គួរបញ្ជាក់ថា សន្និសីទរបស់អ្នកគាំទ្របក្សប្រឆាំងនៅក្រៅប្រទេស បានប្រព្រឹត្តិទៅតាមការគ្រោងទុកនៅថ្ងៃទី១ ខែធ្នូនេះ នៅទីក្រុងអាត្លង់តា សហរដ្ឋអាមេរិក ដើម្បីស្វែងរកយុទ្ធសាស្ត្រថ្មីជំរុញឱ្យដោះលែងលោក កឹម សុខា និងឱ្យគណបក្សសង្គ្រោះជាតិរស់ឡើងវិញ។ ប៉ុន្តែអ្នកគាំទ្រគណបក្សសង្គ្រោះជាតិមួយក្រុមប្រចាំសហរដ្ឋអាមេរិក ក៏បានចេញសេចក្តីថ្លែងការណ៍មួយនៅថ្ងៃទី៣០ វិច្ឆិកា ដោយបដិសេធចំពោះសន្និសីទនេះ ហើយថាអ្នកដែលទៅចូលរួមសន្និសីទនេះ គឺជាការចាកចេញពីគណបក្សសង្គ្រោះជាតិដោយចំហ ដើម្បីទៅចូលរួមជាមួយចលនារបស់លោក សម រង្ស៊ី៕

ប្រភព៖ Vayo Fm ប្រែសម្រួល៖ សុខ សុវត្ថិ