Suzuki Cup៖ គ្រូក្រុមបាល់ទាត់ម៉ាឡេស៊ីថា នឹងបង្កើតប្រវត្តិសាស្ត្រថ្មី

2018-12-11 07:02:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Tan Cheng Hoe គ្រូបង្វឹកក្រុមបាល់ទាត់ជម្រើសជាតិម៉ាឡេស៊ី បានថ្លែងថា ការផ្លាស់ប្ដូរនៅក្នុងក្រុមជម្រើសជាតិម៉ាឡេស៊ីរបស់លោក កំពុងមានការវិវឌ្ឍល្អប្រសើរ និងអាចជួយឲ្យក្រុមរបស់លោកទទួលបានលទ្ធផលជាទីគាប់ចិត្ត ក្នុងការប្រកួតជើងទី១ វគ្គផ្តាច់ព្រ័ត្រពានរង្វាន់ AFF Suzuki Cup 2018 ក្នុងដី ទល់នឹងក្រុមវៀតណាម។

ម៉ាឡេស៊ី ធ្លាប់គ្រងជើងឯក Suzuki Cup តែមួយលើកគត់ គឺកាលពីឆ្នាំ២០១០។

លោក Tan Cheng Hoe គ្រូបង្វឹកក្រុមបាល់ទាត់ម៉ាឡេស៊ី ថ្លែងក្នុងសន្និសីទសារព័ត៌មាន មុនប៉ះវៀតណាម (រូបថត៖ AFF/Lagardere)

ថ្លែងក្នុងសន្និសីទសារព័ត៌មាន មុនការប្រកួត ដែលនឹងធ្វើឡើង នៅល្ងាចថ្ងៃទី១១ ខែធ្នូ ឆ្នាំ២០១៨នេះ លោក Tan បានឲ្យដឹងថា៖ «ជោគជ័យកាលពីឆ្នាំ២០១០ គឺជាអ្វីដែលខ្ញុំនឹងចងចាំទុកជារៀងរហូត។ ក៏ប៉ុន្តែ ក្នុងការដឹកនាំរបស់ខ្ញុំ ពួកយើងត្រូវតែបង្កើតប្រវត្តិសាស្ត្រថ្មី។ ខ្ញុំជឿជាក់យ៉ាងមោះមុតថា កូនក្រុមនិងជំនួយការរបស់ខ្ញុំ សុទ្ធតែចង់បានជោគជ័យសម្រាប់ខ្លួនឯង ត្បិតអីវៀតណាមជាក្រុមដ៏ខ្លាំងមួយ»។

លោកបន្តថា៖ «ពួកយើងនឹងយកការប្រកួតក្នុងផ្ទះក្រោមក្រសែភ្នែកអ្នកទស្សនារបស់យើង ក្នុងជើងទីមួយ ដើម្បីយកជ័យជម្នះ។ គូប្រកួតរបស់យើង មានចលនារហ័ស ដូច្នេះខ្សែការពារយើង ត្រូវតែប្រុងប្រយ័ត្ន»។

លោកបន្ថែមថា៖ «ការប្រកួតនៅក្រុងហាណូយ លើកមុន គឺជាការប្រកួតមួយដ៏លំបាក។ វាជាការប្រកួតក្នុងវគ្គចែកពូល តែកីឡាកររបស់ខ្ញុំ បានសិក្សាពីកំហុសក្នុងបរាជ័យនោះហើយ»។

លោក Tan ឲ្យដឹងទៀតថា លោកដែលធ្លាប់ជាកីឡាករខ្លួនឯង ក៏ធ្លាប់មានបទពិសោធដូច្នេះផងដែរ កាលពីព្រឹត្តិការណ៍ស៊ីហ្គេម ២០០៩ ។ ម៉ាឡេស៊ី បានចាញ់ វៀតណាម ៣-១ នៅវគ្គចែកពូល តែបានសងសឹកវៀតណាមវិញ នៅក្នុងវគ្គផ្តាច់ព្រ័ត្រ ដោយយកឈ្នះ ១-០។

សូមជម្រាបថា ម៉ាឡេស៊ី បានប្រកួតចាញ់វៀតណាម នៅវគ្គចែកពូល Suzuki Cup 2018 ដោយលទ្ធផល ២-០ ៕

ប្រភព៖ Goal ប្រែសម្រួល៖ លាភ.