សម្តេចក្រុមព្រះ គ្រោងយាងមកកម្ពុជា ក្នុងពេលឆាប់ៗនេះ

2019-01-02 07:03:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះរាជសុខភាពរបស់សម្តេចក្រុមព្រះ នរោត្តម រណឫទ្ធ អតីតព្រះប្រធានគណបក្សរាជានិយមហ្វ៊ុនស៊ិនប៉ិច បានវិលត្រឡប់មករកភាពល្អប្រសើរវិញហើយ បន្ទាប់ពីព្រះអង្គបានទទួលការព្យាបាលរបួសនៅក្រៅប្រទេសអស់រយៈពេលជាច្រើនខែ ក្រោយពីព្រះអង្គបានជួបគ្រោះថ្នាក់ចរាចរណ៍ កាលពីខែ មិថុនា ឆ្នាំ២០១៨កន្លងទៅ។ នៅសប្តាហ៍ក្រោយព្រះអង្គ នឹងចូលទៅពិនិត្យសុខភាពចុងក្រោយ ហើយអាចយាងមកប្រទេសកម្ពុជាវិញក្នុងពេលឆាប់ៗនេះ។

លោក ណុប សុធារិទ្ធិ អ្នកនាំពាក្យគណបក្សហ្វ៊ុនស៊ិនប៉ិច នៅថ្ងៃទី២ ខែមករា ឆ្នាំ២០១៩នេះ បានអះអាងថា ស្ថានភាពព្រះរាជសុខភាពរបស់សម្តេចក្រុមព្រះ មានភាពល្អប្រសើរឡើងវិញហើយ ដោយព្រះអង្គអាច សោយ និង យាងបានធម្មតាឡើងវិញ។ លោកថា នៅសប្តាហ៍ក្រោយក្រុមគ្រូពេទ្យ នឹងពិនិត្យព្រះរាជសុខភាពព្រះអង្គលើកចុងក្រោយ ហើយបើមានការអនុញ្ញាត ព្រះអង្គនឹងយាងត្រឡប់មកប្រទេសកម្ពុជាវិញ ក្នុងពេលឆាប់ៗនេះ។

យ៉ាងណាក៏ដោយ អ្នកនាំពាក្យគណបក្សហ្វ៊ុនស៊ិនប៉ិចរូបនេះ មិនបានបញ្ជាក់ឲ្យបានច្បាស់លាស់ពីកាលបរិច្ឆេទនៃការយាងមកកាន់មាតុប្រទេសវិញរបស់សម្តេចក្រុមព្រះនៅឡើយទេ។

សូមជម្រាបថា សម្តេចក្រុមព្រះ នរោត្តម រណឬទ្ធិ បានជួបគ្រោះថ្នាក់ចរាចរណ៍មួយ កាលពីថ្ងៃទី ១៧ ខែមិថុនា ឆ្នាំ២០១៨ ស្ថិតនៅក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ បន្ទាប់ពីក្បួនរថយន្តរបស់ព្រអង្គ បានប៉ះទង្គិចជាមួយរថយន្តឈ្នួលដឹកអ្នកដំណើរមួយគ្រឿង។ ហេតុការណ៍គ្រោះថ្នាក់នេះ បានបណ្តាលឲ្យអ្នកម្នាង អ៊ុក ផល្លា បានទទួលមរណភាព ខណៈសម្តេចក្រុមព្រះនរោត្តម រណឫទ្ធិ បានរងរបួសធ្ងន់។

របាយការណ៍អង្កេតបឋមរបស់អគ្គស្នងការនគរបាលជាតិបានបង្ហាញថា ហេតុការណ៍ដែលបានកើតឡើងលើសម្តេចក្រុមព្រះ គឺជាគ្រោះថ្នាក់ចរាចរណ៍សុទ្ធសាធ មិនមែនជាករណីឃាតកម្មនោះទេ។

បច្ចុប្បន្នគណបក្សហ្វ៊ុនស៊ិនប៉ិច ដឹកនាំដោយបុត្រាច្បងសម្តេចក្រុមព្រះ គឺព្រះអង្គម្ចាស់ នរោត្តម ចក្រាវុឌ្ឍ ប្រធានស្តីទីគណបក្សហ្វ៊ុនស៊ិនប៉ិច។ ក្រៅពីការតែងតាំងព្រះអង្គម្ចាស់ នរោត្តម ចក្រាវុឌ្ឍ ជាប្រធានស្តីទី សម្តេចក្រុមព្រះក៏តែងតាំងអគ្គលេខាធិការរងម្នាក់ ដែលកាន់កាប់ហិរញ្ញវត្ថុបក្ស គឺលោក ពេជ្រ សូដេថ្ថា ឲ្យធ្វើជាអគ្គលេខាធិការគណបក្សហ្វ៊ុនស៊ិនប៉ិចផងដែរ៕

ប្រភព៖ Vayo Fm ប្រែសម្រួល៖ លាភ.