ក្រុមហ៊ុនចិន សម្រេចបោះទុនជិត ២ពាន់លានដុល្លារ វិនិយោគបន្ថែមក្នុងខេត្តកោះកុង
- 2019-01-11 06:49:58
- ចំនួនមតិ 0 | ចំនួនចែករំលែក 0
ក្រុមហ៊ុនចិន សម្រេចបោះទុនជិត ២ពាន់លានដុល្លារ វិនិយោគបន្ថែមក្នុងខេត្តកោះកុង
ចន្លោះមិនឃើញ
ក្រុមហ៊ុនចិន Union Group នឹងបន្តបោះទុនចំនួន ១៩០០លានដុល្លារបន្ថែមទៀត វិនិយោគក្នុងខេត្តកោះកុង នៅឆ្នាំ២០១៩ លើគម្រោងព្រលានយន្តហោះអន្តរជាតិ កំពង់ផែអន្តរជាតិ កំពង់ផែទេសចរណ៍ ទីលានកូនហ្គោល និងតំបន់ទេសចរណ៍ជាប់មាត់សមុទ្រជាច្រើនកន្លែងទៀត ដែលគ្របដណ្តប់លើផ្ទៃដី ២៥គីឡូម៉ែត្រ៤ជ្រុង ។ នេះបើតាមការលើកឡើងរបស់កញ្ញា Lin Wang នាយកទីផ្សារក្រុមហ៊ុន Union Group ក្នុងពិធីបង្ហាញគម្រោងកាលពីថ្ងៃទី១០ ខែមករា ឆ្នាំ២០១៩។
កញ្ញាបញ្ជាក់យ៉ាងដូច្នេះថា៖ «ថ្ងៃនេះ (ថ្ងៃ១០មករា) យើងផ្តោតលើការបើកគម្រោងទីក្រុង TEMI រីសតទេសចរណ៍ ព្រោះ TEMI ស្ថិតក្នុងបេះដូងនៃតារាសាគរទាំងមូល។ អ៊ីចឹង ដើម្បីឲ្យគេដឹង គេស្គាល់ ជាលើកដំបូងឲ្យគេរើសកន្លែងដែលល្អដើម្បីលក់ជាលើកដំបូង។ គោលដៅចូលមកនៅរបស់យើង គឺគ្រប់ពូជសាសន៍ទាំងអស់មិនមែនតែចិន ឬខ្មែរទេ គឺផ្តល់ឲ្យគ្រប់ជាតិសាសន៍ លើពិភពលោក អាចទិញបានដូចគ្នា មានលក្ខណៈជាវីឡា វិនិយោគ ឬទិញដីសម្រាប់ការសាងសង់ខ្លួនឯង ក៏បានដែរ មាន៣ជម្រើស»។
បើតាមនាយកទីផ្សាររូបនេះ ឱ្យដឹងថា គម្រោងទីក្រុង TEMI មានផ្ទៃដីជាង៥គីឡូម៉ែត្រ ស្ថិតនៅចំបេះដូងនៃតំបន់តារាសាគរទាំងមូល មានលក្ខណៈ ជាវីឡារីសត អូប័រទេសចរណ៍ ទូកកម្សាន្ត ប្រហែលជាង១០០០។ គម្រោងនេះ មានរយៈពេល ១០ឆ្នាំ ហើយនៅពេលសាងសង់រួច ទីក្រុងនេះនឹងអាចផ្ទុកមនុស្សបាន ៣០ម៉ឺននាក់។ បច្ចុប្បន្នទីក្រុងនេះ កំពុងត្រូវបានសាងសង់ដែលនឹងចេញជារូបរាង ជាផ្ទះគំរូក្នុងរយៈពេលប៉ុន្មានខែទៀត៕