គម្រោងសាងសង់ស្ពានឆ្លងទន្លេល្ពៅ កម្ពុជា-ឡាវ ត្រូវបានសិក្សារួចរាល់

2019-01-15 07:26:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អ៊ុន ចាន់ដា អភិបាលខេត្តព្រះវិហារ បានឲ្យដឹងថា គម្រោងសាងសង់ស្ពានឆ្លងទន្លេល្ពៅ តភ្ជាប់កម្ពុជា-ឡាវ អាជ្ញាធរខេត្តព្រះវិហារ និងអាជ្ញាធរខាងខេត្តចំប៉ាសាក់ ប្រទេសឡាវ បានសិក្សារួចហើយ រួមទាំងទីតាំង។ វានឹងផ្ដល់ប្រយោជន៍ជាច្រើនដល់ប្រជាពលរដ្ឋ ដែលនឹងក្លាយជាសរសៃឈាមសេដ្ឋកិច្ច បម្រើឲ្យវិស័យពាណិជ្ជកម្ម សេដ្ឋកិច្ច និងទេសចរណ៍។

លោក អ៊ុន ចាន់ដា អភិបាលខេត្តព្រះវិហារ ថ្លែងប្រាប់អ្នកសារព័ត៌មាន (រូបថត៖ រស្មីកម្ពុជា)

ពាក់ព័ន្ធនឹងការងារសាងសង់ស្ពានទន្លេល្ពៅនេះ អាជ្ញាធរខេត្តព្រះវិហារ បានឲ្យដឹងថា ប្រសិនបើស្ពាននេះលេចជារូបរាង ស្ពាននេះនឹងធ្វើឲ្យខេត្តព្រះវិហារ កាន់តែមានមុខមាត់ តាមរយៈការផ្លាស់ប្ដូរទំនាក់ទំនង រវាងប្រទេស និងប្រទេស ការវិនិយោគ ការផ្លាស់ប្ដូរទំនិញ ទេសចរណ៍ ពិសេសប្រយោជន៍ដល់ប្រជាពលរដ្ឋជាធំ។

ស្ពានឆ្លងទន្លេ និងឆ្លងប្រទេសនេះ គឺជាគម្រោងស្ពានបេតុង ដែលស្ថិតក្នុងឃុំកំពង់ស្រឡៅ ស្រុកឆែប ខេត្តព្រះវិហារ ជាប់ព្រំប្រទល់ ខេត្តចំប៉ាសាក់ ប្រទេសឡាវ។

ទាក់ទងនឹងការសាងសង់ស្ពាននេះដែរ លោក សំ លាង ទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារ បានឲ្យដឹងដែរថា ស្ពានទន្លេល្ពៅ ដែលគ្រោងសាងសង់នេះ មានប្រវែងប្រមាណជាង ១០០ម៉ែត្រ ទទឹងជាង ១០ម៉ែត្រ គ្រោងចំណាយប្រមាណ ២លានដុល្លារអាមេរិកជាមួយនឹងការសាងសង់ផ្លូវកៅស៊ូប្រភេទ DBST ប្រវែងប្រមាណ ៧៥គីឡូម៉ែត្រ ទៅគល់ស្ពាននេះផងដែរ។

លោកបន្តថា តំបន់នេះ ក៏នឹងក្លាយជាសរសៃឈាមសេដ្ឋកិច្ចសំខាន់ បម្រើឲ្យវិស័យពាណិជ្ជកម្ម សេដ្ឋកិច្ច និងពិសេស ទេសចរណ៍ ជាមួយការវិនិយោគរបស់ក្រុមហ៊ុនចិនហុងកុង លើទឹកប្រាក់ប្រមាណ ៤ពាន់លានដុល្លារអាមេរិក៕

ប្រភព៖ រស្មីកម្ពុជា ប្រែសម្រួល៖ លាភ.