កម្ពុជា ត្រៀមធ្វើជាម្ចាស់ផ្ទះកីឡាប៉េតង់ជើងឯកពិភពលោក ជាលើកដំបូង

2019-01-16 01:39:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា នឹងរៀបចំធ្វើជាម្ចាស់ផ្ទះព្រឹត្តិការណ៍ជើងឯកកីឡាប៉េតង់ពិភពលោក ជាលើកដំបូង ក្នុងឆ្នាំ២០១៩នេះ បន្ទាប់ពីទទួលបានសិទ្ធិពីសហព័ន្ធកីឡាប៉េតង់អន្តរជាតិ ដែលមន្ត្រីជាន់ខ្ពស់របស់សហព័ន្ធអន្តរជាតិមួយនេះ នឹងមកជួយជ្រោមជ្រែងដល់ការបណ្តុះបណ្តាលបច្ចេកទេសដល់មន្ត្រីកម្ពុជា និងផែនការរៀបចំត្រៀមការប្រកួតជើងឯកពិភពលោក។ នេះបើតាមការចុះផ្សាយរបស់ក្រសួងព័ត៌មាន កាលពីថ្ងៃទី១៥ ខែមករា ឆ្នាំ២០១៩។

លោក ស សុខា រដ្ឋលេខាធិការក្រសួងអប់រំ យុវជន និងកីឡា

លោក ស សុខា រដ្ឋលេខាធិការក្រសួងអប់រំ យុវជន និងកីឡា បានបញ្ជាក់កាលពីពេលថ្មីៗកន្លងទៅនេះថា ការទទួលធ្វើជាម្ចាស់ផ្ទះ ព្រឹត្តិការណ៍កីឡាប៉េតង់ជ្រើសរើសជើងឯកពិភពលោក ឆ្នាំ២០១៩នេះ គឺជាការលើកមុខលើកមាត់របស់ព្រះរាជាណាចក្រកម្ពុជាលើឆាកអន្តរជាតិ ដែលសហព័ន្ធអន្តរជាតិ ផ្តល់សិទ្ធិជូនកម្ពុជា ក្នុងការរៀបចំការប្រកួតកម្រិតពិភពលោកជាលើកដំបូងបែបនេះ។ លោកបានចាត់ទុកថា នេះគឺជាភារកិច្ចដ៏ធំធេង ដែលគ្រប់សមាសភាពពាក់ព័ន្ធទាំងអស់ រួមទាំងសហព័ន្ធប៊ូល និងប៉េតង់កម្ពុជាត្រូវខិតខំរួមគ្នា ដើម្បីសម្រេចបាននូវលទ្ធផលជាផ្លែផ្កា នៅក្នុងកម្រិតពិភពលោកនេះ ហើយក៏ជាឱកាសដ៏ល្អមួយក្នុងការបង្ហាញស្នាដៃរបស់កម្ពុជាអាចធ្វើបាន។

លោករដ្ឋលេខាធិការបានអះអាងថា សម្រាប់ការរៀបចំកម្រិតពិភពលោកនេះ គឺកម្ពុជាមានការបារម្ភខ្លះដែរ ប៉ុន្តែប្រសិនបើកម្ពុជាមិនខិតខំជម្នះរាល់ឧបសគ្គ និងចាប់ផ្តើមធ្វើទេ វានឹងមិនទទួលបានលទ្ធផលល្អឡើយ។ លោករំពឹងថា ការទទួលធ្វើម្ចាស់ផ្ទះជើងឯកពិភពលោកកីឡាប៉េតង់នេះនឹងទទួលបានជោគជ័យ ដែលនឹងមានបណ្តាប្រទេសជិតខាងមួយចំនួនមកសិក្សាពីកម្ពុជាលើការរៀបចំព្រឹត្តិការណ៍អន្តរជាតិបែបនេះ។

បើតាមការបញ្ជាក់របស់ក្រសួងអប់រំ យុវជន និងកីឡា ក្នុងការទំនាក់ទំនងរបស់ខ្លួន ក៏ដូចជាសហព័ន្ធ កីឡាប៊ូល និងប៉េតង់កម្ពុជាជាមួយលោក Claude Azema ប្រធានសហព័ន្ធកីឡាប៉េតង់អន្តរជាតិ តាមរយៈសារអេឡិចត្រូនិកបានឲ្យដឹងថា លោក Claude Azema នឹងអញ្ជើញមកកម្ពុជារយៈពេល ៧ថ្ងៃចាប់ថ្ងៃទី១៧ ដល់ថ្ងៃទី២៥ ខែកុម្ភៈ ឆ្នាំ២០១៩នេះ ក្នុងគោលបំណងបើកវគ្គបណ្តុះបណ្តាលអាជ្ញាកណ្តាលរយៈពេល ៤ថ្ងៃ និងរៀបចំកិច្ចប្រជុំត្រៀមការប្រកួតជើងឯកពិភពលោក នៅកម្ពុជា ឆ្នាំ២០១៩។

កីឡាការិនី អ៊ុក ស្រីមុំ (ឆ្វេង) និង កីឡាការិនី កែ ឡេង

សូមរំឭកថា ការទទួលបានសិទ្ធិពីសហព័ន្ធកីឡាប៉េតង់អន្តរជាតិ ក្នុងការរៀបចំជើងឯកពិភពលោករបស់កម្ពុជា ក្នុងឆ្នាំ២០១៩នេះ គឺក្រោយពេលដែលវិស័យកីឡាប៉េតង់កម្ពុជាធ្លាប់ដណ្តើមបានជយលាភីកម្រិតពិភពលោកជាច្រើនសម័យកាល នាពេលកន្លងមក ដូចជាវីរកីឡាការិនី កែ ឡេង ឈ្នះមេដាយមាស ៣សម័យកាល កាលពីឆ្នាំ២០១៣ នៅប្រទេសបារំាង, ឆ្នាំ២០១៥ នៅប្រទេសថៃ និងឆ្នាំ២០១៧ នៅប្រទេសចិន ហើយឈ្នះមេដាយមាសពីការប្រកួតប្រទេសខ្លាំងៗអន្តរជាតិ នៅប្រទេសបារំាង។ ក្រៅពីនោះ កីឡាករប៉េតង់កម្ពុជា សុខ ចាន់មាន ក៏ឈ្នះមេដាយមាសជើងឯកពិភពលោក ឆ្នាំ២០១៦ និងកីឡាការិនី អ៊ុក ស្រីមុំ ក៏ធ្លាប់ឈ្នះមេដាយមាស ជើងឯកពិភពលោកផងដែរ៕

អត្ថបទ៖ លាភ.