Son សារភាពថា ខ្លួនអស់កម្លាំងនិងដេកមិនគ្រប់គ្រាន់ ទើបធ្វើឱ្យកូរ៉េខាងត្បូង ធ្លាក់ពី AFC Asian Cup

2019-01-28 06:39:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយក្រុមកូរ៉េខាងត្បូង បានធ្លាក់ចេញពីពានរង្វាន់ប្រចាំទ្វីបអាស៊ី ក្រោមថ្វីជើងក្រុមកាតា កីឡាករ Son Heung-min បានសារភាពថា គឺដោយសារស្ថានភាពរាងកាយរបស់ខ្លួនមានការចុះខ្សោយ ទើបធ្វើឱ្យធ្លាក់ទម្រង់លេង។

ខ្សែប្រយុទ្ធកូរ៉េខាងត្បូងវ័យ ២៦ឆ្នាំរូបនេះ បាននិយាយថា ការអស់កម្លាំង និងខ្វះការដេកឱ្យបានគ្រប់គ្រាន់ បានធ្វើឱ្យការលេងរបស់ខ្លួនធ្លាក់ចុះ ក្នុងការប្រកួតនេះ ហើយបណ្តាលឱ្យក្រុមទទួលលទ្ធផលមិនល្អ។ «ខ្ញុំហាក់គ្មានកម្លាំងអ្វីទាល់តែសោះ។ ខ្ញុំពិតជាមានការសោកស្តាយ ចំពោះមិត្តរួមក្រុម គ្រូបង្វឹក និងអ្នកគាំទ្រ ដែលធ្វើឱ្យក្រុមធ្លាក់»។

Son ដែលជាខ្សែប្រយុទ្ធដ៏ឆ្នើម១រូបរបស់ Tottenham Hotspur បានបន្ថែមថា «ខ្ញុំគិតថា ខ្ញុំនឹងអាចមានការរីកចម្រើន នៅក្នុងការប្រកួតពានរង្វាន់នេះ ប៉ុន្តែវាមិនបានកើតឡើងឡើយ។ មនុស្សជាច្រើនរំពឹងខ្ពស់មកលើយើង ហើយខ្ញុំខឹងខ្លួនឯង ដែលមិនអាចធ្វើវាបាន។ ខ្ញុំដឹងថា ខ្ញុំលេងមិនល្អឡើយ»។

សូមជម្រាបថា ក្រុមកូរ៉េខាងត្បូង បានប្រកួតចាញ់ កាតា ០-១ ក្នុងវគ្គ៨ក្រុមចុងក្រោយ នៃពានរង្វាន់ AFC Asian Cup 2019 នៅអារ៉ាប់រួមកាលពីយប់ថ្ងៃទី២៥ ខែមករា ឆ្នាំ២០១៩។ ១គ្រាប់នេះគឺស៊ុតបញ្ចូលទីដោយ Abdulaziz Hatem នៅនាទី៧៨៕

ប្រភព៖ Fox Sports Asia ប្រែសម្រួល៖ សំភី