វ៉ា សុខថន៖ «ខ្ញុំត្រឡប់មកវិញ ដើម្បីបន្តបំពេញមហិច្ឆតារបស់ខ្ញុំក្នុងបាល់ទាត់»

2019-01-30 03:41:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វ៉ា សុខថន អះអាងថា ក្រៅតែពីការស្រឡាញ់ប្រទេស ស្រឡាញ់ភ្នំពេញ និង ចង់ចែករំលែកបទពិសោធដល់កីឡាករវ័យក្មេង, ការបន្តដំណើរលើវិថីបាល់ទាត់ ដើម្បីបំពេញក្ដីស្រមៃរបស់ខ្លួន ជាផ្នែកធំមួយជំរុញរូបគេឲ្យចូលរួមជាមួយភ្នំពេញក្រោនសាជាថ្មី។ នេះបើតាមការចុះផ្សាយរបស់ CNCC នៅថ្ងៃទី៣០ ខែមករា ឆ្នាំ២០១៩នេះ។

វ៉ា សុខថន (រូបថត៖ ភ្នំពេញក្រោន)

ខ្សែបម្រើសញ្ជាតិបារាំងដើមកំណើតខ្មែរ បាននិយាយដូច្នេះថា «ដូចខ្ញុំធ្លាប់ប្រាប់បណ្ដាញសារព័ត៌មានកន្លងមកហើយ ខ្ញុំមកស្រុកខ្មែរវិញលើកនេះ ព្រោះខ្ញុំស្រឡាញ់ទឹកដីកំណើតឪពុកម្ដាយខ្ញុំ ស្រឡាញ់ភ្នំពេញក្រោនដែលខ្ញុំធ្លាប់ឈ្នះពានជាមួយ និង ចង់ជួយពង្រឹងសមត្ថភាពកីឡាករក្មេងៗ។ ប៉ុន្តែខ្ញុំមានហេតុផលសំខាន់មួយទៀតសម្រាប់ខ្លួនខ្ញុំ គឺខ្ញុំចង់ធ្វើឲ្យមហិច្ឆតា ក្នុងវិស័យបាល់ទាត់របស់ខ្ញុំរស់ឡើងវិញ មានន័យថា ខ្ញុំចង់សាងកេរ្តិ៍ឈ្មោះជាថ្មី ពិសេសខ្ញុំចង់បង្ហាញមុខក្នុងក្រុមជម្រើសជាតិតំណាងប្រទេសរបស់ខ្ញុំម្ដងទៀត»។

បន្ថែមលើនេះ ខ្សែបម្រើមានប្រភពពីភាគខាងកើតប្រទេសបារាំង និយាយដោយសុទិដ្ឋិនិយមថា ខ្លួនមានអារម្មណ៍ល្អមែនទែន ចំពោះការត្រឡប់មកលើកនេះ ហើយតាំងចិត្តខ្ពស់សម្រាប់ការប្រជែងលីគកំពូល២០១៩ ដោយពុំបារម្ភពីឧបសគ្គណាមួយឡើយ ដ្បិតគេយល់ថាជោគជ័យ ឬ បរាជ័យសុទ្ធតែជាមេរៀន សំខាន់រូបគេនឹងដើរទៅមុខដោយពុំរាថយ។

សូមរំឭកថា វ៉ា សុខថន ចូលរួមជាមួយភ្នំពេញក្រោនដំបូង កាលពីឆ្នាំ២០១៤ ហើយជួយក្រុមលើកពានលីគកំពូល មុនជាប់ជម្រើសជាតិក្រុមធំ នៅដើមឆ្នាំ២០១៥ តែត្រូវបង្ខំចិត្តត្រឡប់ទៅស្រុកបារាំងវិញ នាចុងឆ្នាំនោះ ក្រោមហេតុផលគ្រួសារ៕

អត្ថបទ៖ លាភ.