AFC Asian Cup វគ្គផ្តាច់ព្រ័ត្រ៖ គ្រូជប៉ុនថា ទោះកាតាខ្លាំងប៉ុណ្ណា ក៏គ្មានបញ្ហាដែរ

2019-02-01 08:11:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Hajime Moriyasu អ្នកចាត់ការទូទៅក្រុមជម្រើសជាតិជប៉ុន បានបង្ហាញការជឿជាក់ថា ក្រុមលោកនឹងឈ្នះជើងឯក AFC Asian Cup ជាលើកទី៥ ក្នុងការប្រកួតផ្តាច់ព្រ័ត្រជាមួយកាតា នៅម៉ោង៩យប់ថ្ងៃទី១ ខែកុម្ភៈ ឆ្នាំ២០១៩នេះ បើទោះបីជាក្រុមអារ៉ាប់មួយនេះ ខ្លាំងយ៉ាងណាក៏ដោយ។

លោក Hajime Moriyasu អ្នកចាត់ការទូទៅក្រុមជម្រើសជាតិជប៉ុន (រូបថតផ្តល់សិទ្ធិដោយ Reuters)

ថ្លែងក្នុងសន្និសីទសារព័ត៌មានកាលពីម្សិលមិញ លោក Moriyasu បាននិយាយយ៉ាងដូច្នេះថា៖ «យើងដឹងថា យើងត្រូវប្រកួតទល់នឹងក្រុមខ្លាំងមួយ ប៉ុន្តែមិនខ្វល់ថា ពួកគេជានរណា ពួកគេខ្លាំងប៉ុណ្ណាក៏ដោយ ក៏យើងនៅតែលេងតាមយុទ្ធសាស្រ្ត និងភាពខ្លាំងរបស់យើង ដូចកាលយើងធ្វើបានគ្រប់ការប្រកួតកន្លងមកក្នុងពានរង្វាន់នេះ»។

លោកបញ្ជាក់ថា កូនក្រុមរបស់លោក មានសមត្ថភាពអាចសម្របគ្រប់ស្ថានការណ៍ ហើយពួកគេមានការអត់ធ្មត់ខ្ពស់។

អ្នកចាត់ការរូបនេះ បន្តថា «យើងគោរពគ្រប់គូប្រកួតរបស់យើង ហើយចង់ធ្វើឱ្យបានល្អបំផុតដើម្បីឈ្នះការប្រកួតនេះ។ យើងបានឈានដល់វគ្គផ្តាច់ព្រ័ត្រ ដោយកាន់តែមានការរីកចម្រើន បន្ទាប់ការប្រកួតកន្លងមក»។

សូមបញ្ជាក់ថា ជប៉ុន បានឡើងទៅដល់វគ្គផ្តាច់ព្រ័ត្រនេះ ដោយឈ្នះអ៊ីរ៉ង់ ៣-០ ខណៈកាតា ឈ្នះ ម្ចាស់ផ្ទះអារ៉ាប់រួម ៤-០ នៅវគ្គពាក់កណ្តាលផ្តាច់ព្រ័ត្រ។ ជប៉ុនបានឈ្នះជើងឯក AFC Asian Cup ចំនួន៤ដងរួចមកហើយ ដែលជាចំនួនច្រើនជាងគេ គឺនៅឆ្នាំ ១៩៩២, ២០០០, ២០០៤ និង ២០១១។ ឯ កាតា នេះគឺជាលើកទីមួយហើយដែលឈានដល់វគ្គផ្តាច់ព្រ័ត្រ៕