អ្នកនាំពាក្យក្រសួងការពារជាតិ បដិសេធថា មិនបាននិយាយអំពីការបាញ់បង្ហោះផ្កាយរណបទេ

2019-02-11 01:35:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានបញ្ជាក់នាព្រឹកថ្ងៃទី១១ ខែកុម្ភៈថា ក្នុងឆ្នាំ២០១៩នេះ លោកមិនបាននិយាយអំពីគម្រោងបាញ់បង្ហោះប្រព័ន្ធផ្កាយរណបរបស់កម្ពុជាជាមួយសារព័ត៌មាន ឬនៅក្នុងវេទិកាណាមួយឡើយ។

លោកបានលើកឡើងយ៉ាងដូច្នេះថា៖ «ខ្ញុំមានការងឿយឆ្ងល់បន្តិចដែរ ដែលឃើញសារព័ត៌មានមួយចំនួន បានចុះផ្សាយបន្តគ្នាថា ខ្ញុំបានធ្វើអត្ថាធិប្បាយទាក់ទងនឹងគម្រោងបង្ហោះប្រព័ន្ធផ្កាយរណបរបស់កម្ពុជា នាថ្មីៗនេះ។ ទោះបីជារឿងនេះ ជារឿងវិជ្ជមានក៏ពិតមែន ប៉ុន្តែខ្ញុំសូមស្នើឱ្យសារព័ត៌មានមួយចំនួននោះ ធ្វើការកែតម្រូវឡើងវិញ»។

លោកនាយឧត្តមសេនីយ៍ ឈុំ សុជាត ថ្លែងទៅកាន់អ្នកសារព័ត៌មាននាពេលកន្លងមក (រូបថត៖ ហ្វេសប៊ុកលោក ឈុំ សុជាត)

អ្នកនាំពាក្យរូបនេះ យល់ឃើញថា អ្នកសារព័ត៌មានដែលសរសេររឿងនេះ អាចទំនងមានការភាន់ច្រឡំចំពោះប្រភពដែលផ្តល់ព័ត៌មានខាងលើនេះ។

សូមរំលឹកថា ទីភ្នាក់ងារសារព័ត៌មានកម្ពុជា (AKP) បានចុះផ្សាយដោយដកស្រង់សម្តីលោក ឈុំ សុជាត ដែលបាននិយាយកាលពីថ្ងៃទី៨ ខែកុម្ភៈ ឆ្នាំ២០១៩ថា នៅប៉ុន្មានឆ្នាំខាងមុខនេះ ប្រទេសកម្ពុជា មានគម្រោងបង្ហោះប្រព័ន្ធផ្កាយរណប ដើម្បីសម្រួលដល់ការគ្រប់គ្រងខាងផ្នែកសន្តិសុខជាតិ សណ្តាប់ធ្នាប់ និងការគ្រប់គ្រងនូវសន្តិសុខតាមបណ្តោយព្រំដែនជាមួយបណ្តាប្រទេសជិតខាង៕

អត្ថបទ៖ សំភី