មេ Apple ទទួលបានតំណែងសំខាន់មួយ ក្នុងរដ្ឋបាលលោក ដូណាល់ ត្រាំ

2019-02-14 06:27:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងពាណិជ្ជកម្មសហរដ្ឋអាមេរិក កាលពីថ្ងៃទី១៣ ខែកុម្ភៈ ឆ្នាំ២០១៩ បានប្រកាសតែងតាំងសមាជិកក្រុមប្រឹក្សាគោលនយោបាយកម្លាំងពលកម្មអាមេរិកថ្មី ចំនួន ២៥រូប ដែលក្នុងនោះ មាននាយកប្រតិបត្តិរបស់ក្រុមហ៊ុនយក្ស Apple គឺលោក Tim Cook ផងដែរ។

លោក Tim Cook នាយកប្រតិបត្តិក្រុមហ៊ុន Apple

រដ្ឋបាលលោកប្រធានាធិបតីអាមេរិក ដូណាល់ ត្រាំ បានសម្រេចបង្កើតក្រុមប្រឹក្សាគោលនយោបាយកម្លាំងពលកម្មនេះឡើង ដើម្បីដោះស្រាយកង្វះកម្លាំងពលកម្ម ខណៈវិស័យសំខាន់ៗមួយចំនួន ដូចជា បច្ចេកវិទ្យា ស្វ័យប្រវត្តិកម្ម និងបញ្ញាសិប្បនិម្មិត កំពុងមានល្បឿនទៅមុខយ៉ាងឆាប់រហ័ស នៅសហរដ្ឋអាមេរិក។ ក្រុមប្រឹក្សានេះ មានសហប្រធាន ចំនួន ២រូប គឺលោក Wilbur Ross រដ្ឋមន្ត្រីក្រសួងពាណិជ្ជកម្មអាមេរិក និងលោកស្រី Ivanka Trump ទីប្រឹក្សាផ្ទាល់របស់ប្រធានាធិបតី។

សមាជិកទាំង ២៥រូប ដែលត្រូវបានតែងតាំង ក៏មានប្រធានក្រុមហ៊ុន Lockheed Martin គឺលោក Marillyn Hewson, ប្រធានក្រុមហ៊ុន Walmart លោក Doug McMillon, ប្រធានក្រុមហ៊ុន IBM លោក Ginni Rometty ព្រមទាំងសមាជិកដែលជាអភិបាលរដ្ឋមួយចំនួន និងបុគ្គលធំៗមួយចំនួនទៀតផងដែរ។

ការបង្កើតប្រឹក្សាគោលនយោបាយកម្លាំងពលកម្មអាមេរិកនេះ គឺបន្ទាប់ពីលោក ដូណាល់ ត្រាំ បានបង្កើតក្រុមប្រឹក្សាជាតិទទួលបន្ទុកកម្លាំងពលកម្មអាមេរិក កាលពីខែកក្កដា ឆ្នាំ២០១៨ កន្លងទៅ ដើម្បីផ្ដល់ការបណ្ដុះបណ្ដាលយុវជន និងមនុស្សពេញវ័យ នូវជំនាញ ការអប់រំ ដើម្បីសម្រួចគោលដៅរបស់ពួកគេ សម្រាប់ទីផ្សារការងារបច្ចុប្បន្ន និងទៅថ្ងៃអនាគត៕

ប្រភព៖ macrumors ប្រែសម្រួល៖ លាភ.