អ្នកជំនាញជប៉ុន ផ្តល់បច្ចេកទេសផ្នែកសុវត្ថិភាព ដើម្បីកាត់បន្ថយគ្រោះថ្នាក់ចរាចរណ៍នៅកម្ពុជា

2019-02-15 04:24:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានចាត់ទុកការជួយបណ្ដុះបណ្ដាល ការផ្ដល់បច្ចេកទេស និងបទពិសោធន៍ពីអ្នកជំនាញផ្នែកសុវត្ថិភាពចរាចរណ៍ជប៉ុន គឺជាការនាំមកនូវធាតុចូលថ្មីបន្ថែមទៀតដល់មន្រ្ដីជំនាញកម្ពុជា ក្នុងការរួមចំណែកកាត់បន្ថយគ្រោះថ្នាក់ចរាចរណ៍នៅកម្ពុជា។

ក្នុងសិក្ខាសាលាស្ដីពីសុវត្ថិភាពចរាចរណ៍ កាលពីព្រឹកថ្ងៃទី១៤ ខែកុម្ភៈ ឆ្នាំ២០១៩ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា តាមរយៈការផ្ដល់នូវបច្ចេកទេស និងបទពិសោធន៍ពីអ្នកជំនាញសុវត្ថិភាពចរាចរណ៍ជប៉ុននេះ អ្នកជំនាញកម្ពុជា ក៏នឹងទទួលបាននូវបច្ចេកទេស និងវិធីសាស្រ្ដថ្មី ក្នុងការអនុវត្ដទប់ស្កាត់ និងកាត់បន្ថយគ្រោះថ្នាក់ចរាចរណ៍នៅកម្ពុជា ឱ្យកាន់តែទទួលបានលទ្ធផលប្រសើរថែមទៀត។

លោកស្រីបានលើកឡើងថា គ្រោះថ្នាក់ចរាចរណ៍នៅតែជាកង្វល់របស់រាជរដ្ឋាភិបាលកម្ពុជា ដោយសារតែបញ្ហានេះនៅតែកើតមានជារៀងរាល់ថ្ងៃ បណ្តាលឱ្យស្លាប់ របួស ពិការ និងខូតខាតទ្រព្យសម្បត្តិរដ្ឋ និងឯកជន ខណៈដែលផ្លូវស្ពានគ្រប់ទីកន្លែងត្រូវបានសាងសង់ខ្វាត់ខ្វែង ដើម្បីសម្រួលដល់ចរាចរណ៍ដឹកជញ្ជូន បម្រើឱ្យគ្រប់វិស័យនៃតម្រូវការរបស់ប្រជាពលរដ្ឋ និងប្រទេសទាំងមូល។

លោក SUGANO Yuichi ប្រធានតំណាងទីភ្នាក់ងារសហប្រតិបត្ដិការអន្ដរជាតិនៃ ប្រទេសជប៉ុនប្រចាំនៅកម្ពុជា(JICA) បានថ្លែងថា អង្គការ JICA បានគាំទ្រចំពោះសុវត្ថិភាព ចរាចរណ៍នៅកម្ពុជា តាមរយៈការជួយលើកម្មវិធីផ្សេងៗ ការជួយកែសម្រួលនូវហេដ្ឋារចនាសម្ព័ន្ធផ្លូវថ្នល់ និងបង្ការ ទប់ស្កាត់នូវគ្រោះថ្នាក់ចរាចរណ៍នៅទូទាំងប្រទេសកម្ពុជា។

លោកបានបន្ដថា ការបណ្ដុះបណ្ដាលអំពីសុវត្ថិភាពចរាចរណ៍នេះ គឺអង្គការ JICA បាននាំយកមកនូវ អ្នកជំនាញផ្នែក អប់រំ វិស្វកម្ម និងអ្នកជំនាញផ្នែកបង្ការ ទប់ស្កាត់សុវត្ថិភាពចរាចរណ៍ ដើម្បី ចែករំលែកនូវចំណេះដឹង ក៏ដូចជាជំនាញក្នុងការផ្ដល់ជូនដល់មន្រ្ដីកម្ពុជាដែលធ្វើការងារផ្នែក សុវត្ថិភាពចរាចរណ៍នេះ ឱ្យកាន់តែប្រសើរឡើងថែមទៀត។

សូមរំលឹកថា ពេញមួយឆ្នាំ២០១៨ គ្រោះថ្នាក់ចរាចរណ៍នៅកម្ពុជា បានបណ្តាលឱ្យមនុស្សប្រមាណ ១៧៦១នាក់ បាត់បង់ជីវិត។ ចំនួននេះ បានថយចុះ ១% បើប្រៀបធៀបនឹងឆ្នាំ២០១៧។ គ្រឿងស្រវឹង នៅតែជាកត្តាចម្បងដែលបង្កឱ្យមានគ្រោះថ្នាក់ចរាចរណ៍កើតឡើង។ នេះបើយោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃក្រសួងមហាផ្ទៃ៕

ប្រភព៖ AKP ប្រែសម្រួល៖ សំភី