ផលិតកម្មថោន ច្រានចោលព័ត៌មានពីការចាកចេញរបស់កញ្ញា មាស សុខសោភា

2019-02-26 06:22:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដំណឹងនៃការចាកចេញរបស់កញ្ញា មាស សុខសោភា តារាចម្រៀងប្រចាំផលិតកម្មថោន ទៅផលិតកម្មរស្មីហង្សមាស កំពុងតែក្លាយជាប្រធានបទក្តៅគគុកមួយ ដែលត្រូវបានប្រព័ន្ធផ្សព្វផ្សាយព័ត៌មានមួយចំនួន បង្ហោះផ្សព្វផ្សាយផ្អើលពេញហ្វេសប៊ុក។ ប៉ុន្តែព័ត៌មាននេះ ត្រូវបានអ្នកគ្រប់គ្រងទូទៅរបស់ផលិតកម្មថោន បានច្រានចោល។

លោក មាស សុខរតនៈ ប្រធានគ្រប់គ្រងទូទៅផលិតកម្មថោន និងត្រូវជាបងបង្កើតរបស់កញ្ញា មាស សុខសោភា បានថ្លែងកាលពីរសៀលថ្ងៃទី២៥ ខែកុម្ភៈ ឆ្នាំ២០១៩ថា កញ្ញា មាស សុខសោភា គឺមិនបានចាកចេញទៅផលិតកម្មរស្មីហង្សមាសនោះទេ។ «អត់មានទៅណាផង ហើយព័ត៌មានដែលបានផ្សព្វផ្សាយ គឺជាព័ត៌មានចចាមអារាម ហើយបច្ចុប្បន្ននេះ កញ្ញា មាស សុខសោភា នៅផលិតកម្មថោនជាប្រចាំ»។

លោកបានអះអាងថា ប្អូនស្រីរបស់ខ្លួន រីករាយក្នុងការបន្តនៅជាមួយផលិតកម្មថោន ហើយថាកញ្ញា កំពុងតែមមាញឹកខ្លាំងជាមួយនឹងការចេញបទចម្រៀងថ្មីៗ ជាពិសេស គឺបទថ្មី ចំនួន៣បទ សម្រាប់ពិធីបុណ្យចូលឆ្នាំថ្មីប្រពៃណីជាតិ ដែលនឹងចូលមកដល់នាពេលខាងមុខនេះ មានដូចជា៖ បទប៉ក់កន្ទ្រឹមអើយ និង បទរលឹមប្រុយៗ ខណៈបទថ្មីមួយទៀត ទើបតែចាប់ផ្តើមថត។

ប្រធានគ្រប់គ្រងទូទៅផលិតកម្មថោនដដែលនេះ ឱ្យដឹងថា កញ្ញា មាស សុខសោភា មានការមមាញឹកយ៉ាងខ្លាំងក្នុងការចេញសម្តែង ខនសឺត និងត្រៀមចេញក្នុងកម្មវិធីសម្រាប់ទូរទស្សន៍ថោន ជាច្រើនបន្ថែមទៀត រាល់សកម្មភាពទាំងនេះ គ្មានហេតុផលណាដែលធ្វើឲ្យនាង ត្រូវចាកចេញពីផលិតកម្មនេះទេ៕