សម្តេច ហ៊ុន សែន អបអរចំពោះវៀតណាម ដែលបានធ្វើម្ចាស់ផ្ទះនៃជំនួបកំពូល ត្រាំ-គីម

2019-02-26 07:14:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានសម្តែងនូវការអបអរសាទរចំពោះវៀតណាម ដែលបាននឹងកំពុងទទួលស្វាគមន៍នូវជំនួបកំពូលរវាងប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន។ សម្តេចថ្លែងដូច្នេះ ក្នុងជំនួបជាមួយលោក ង្វៀង ហ៊្វូជុង ប្រមុខរដ្ឋវៀតណាម នៅវិមានសន្តិភាព នាព្រឹកថ្ងៃទី២៦ ខែកុម្ភៈ ឆ្នាំ២០១៩។

សូមជម្រាបថា កាលពីព្រឹកមិញ លោក គីម ជុងអ៊ុន បានធ្វើដំណើរទៅដល់ប្រទេសវៀតណាមហើយ តាមរយៈការធ្វើដំណើរតាមរថភ្លើងកាត់តាមប្រទេសចិន ទៅដល់ស្ថានីយរថភ្លើងក្រុង Dong Dang ភាគខាងជើងវៀតណាម ដើម្បីត្រៀមជួបជាមួយលោក ដូណាល់ ត្រាំ ខណៈដែលប្រធានាធិបតីអាមេរិករូបនេះ ត្រូវបានរំពឹងថា នឹងទៅដល់វៀតណាមនៅល្ងាចនេះ។ ជំនួបកំពូលនេះ ធ្វើឡើងពីថ្ងៃទី២៧ ដល់ ២៨ ខែកុម្ភៈ ឆ្នាំ២០១៩ នៅក្រុងហាណូយ។

សម្តេចបានមានប្រសាសន៍ថា កម្ពុជាទទួលបានការអភិវឌ្ឍរហូតមកដល់ពេលនេះ គឺមិនអាចកាត់ផ្ដាច់បានពីកងទ័ពប្រជាជន និងរដ្ឋាភិបាលវៀតណាមឡើយ ហើយសម្ដេចក៏បានឯកភាពជំរុញឲ្យទំនាក់ទំនងនេះ កាន់តែរីកចម្រើនបន្ថែមទៀតផងដែរ។

នៅក្នុងជំនួបនេះ លោក ង្វៀង ហ៊្វូជុង បានជម្រាបជូនសម្តេចនាយករដ្ឋមន្រ្តីថា ក្នុងដំណើរទស្សនកិច្ចនេះ គឺលោកមានបំណងពង្រីក និងពង្រឹងនូវកិច្ចសហប្រតិបត្តិការរវាងប្រទេសទាំងពីរដែលមានស្រាប់ហើយ ហើយក៏ដើម្បីពិនិត្យមើលឡើងវិញនូវរាល់អ្វីដែលបានព្រមព្រៀង កន្លងមកផងដែរ។

ប្រមុខរដ្ឋវៀតណាម បន្ថែមថា លោកបានសង្កេតឃើញថា កម្ពុជា គឺទទួលបានជោគជ័យលើវិស័យជាច្រើនរួមមានការអភិវឌ្ឍខាងហេដ្ឋារចនាសម្ព័ន្ធសំណង់ សេដ្ឋកិច្ចកម្ពុជាគឺមានកំណើនកើនឡើងជាង៧% ហើយស្ថានភាពនៅកម្ពុជាគឺមានស្ថិរភាព និងទំនាក់ទំនងការទូតកម្ពុជា ក៏មានជាមួយបណ្តាប្រទេសនានាជាលំដាប់ផងដែរ៕