សម្តេច ហ៊ុន សែន ប្រកាសសាងសង់ផ្លូវ និងស្ពាន ភ្ជាប់ពីខេត្តកំពង់ឆ្នាំង ទៅកំពង់ធំ

2019-03-16 12:24:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសថា សម្តេចបានសម្រេចចិត្តឱ្យមានការសាងសង់ស្ពាន និងផ្លូវភ្ជាប់ពីខេត្តកំពង់ឆ្នាំង ទៅខេត្តកំពង់ធំ ដើម្បីសម្រួលដល់ការធ្វើដំណើរ ចំណេញពេលវេលា និងកាត់បន្ថយការចំណាយរបស់ប្រជាពលរដ្ឋ។ ការថ្លែងនេះ ធ្វើឡើងក្នុងពេលដែលសម្តេចអញ្ជើញជាអធិបតីក្នុងពិធីបុណ្យទន្លេលើកទី៥ ក្នុងខេត្តកំពង់ឆ្នាំង នាយប់ថ្ងៃទី១៦ ខែមីនា ឆ្នាំ២០១៩។

កំពង់ចម្លង ក្នុងស្រុកកំពង់លែង (រូបថត៖ ក្រសួងសាធារណការ និងដឹកជញ្ជូន)

សម្តេចបញ្ជាក់ថា ផ្លូវនេះ មានចម្ងាយជាង ៥៧គីឡូម៉ែត្រ ដែលតភ្ជាប់ពីស្រុកកំពង់លែង នៃខេត្តកំពង់ឆ្នាំង ទៅកាន់ក្រុងស្ទឹងសែន នៃខេត្តកំពង់ធំ។ ក្នុងនោះគឺត្រូវធ្វើស្ពានដែលវែងជាងគេនៅក្នុងប្រទេសកម្ពុជា គឺមានប្រវែងរហូតទៅដល់ ៣៩០០ម៉ែត្រ ដែលឆ្លងដៃទន្លេទាំង៣ គឺ៖ ទន្លេផ្សារក្រោម, ទន្លេជ្រោយមុខ និងទន្លេកំពង់ហាវ។ ក្រៅពីនេះ ក៏មានការសង់ស្ពានចំនួន២ នៅក្រុងស្ទឹងសែនផងដែរ។

ផ្លូវ៥០C ដែលភ្ជាប់ពីខេត្តកំពង់ឆ្នាំង ទៅខេត្តកំពង់ធំ (រូបថត៖ ក្រសួងសាធារណការ និងដឹកជញ្ជូន)

ប្រមុខរាជរដ្ឋាភិបាលបានអះអាងថា នេះគឺជាការធ្វើស្ពានដើម្បីកុំឱ្យមានផលប៉ះពាល់ទៅលើការធ្វើចរាចរណ៍ផ្លូវទឹក និងចរាចរណ៍ត្រី។ ការសម្រេចនេះ ធ្វើឡើងក្រោយពេលដែលគម្រោងនេះ ត្រូវបានសិក្សាបញ្ចប់រួចរាល់ជាក់លាក់ ដោយមិនមានផលប៉ះពាល់ធនធានធម្មជាតិ និងការបម្លាស់ទីរបស់ត្រីនោះទេ៕