លោក ប៉ា សុជាតិវង្ស ឈរឈ្មោះជាបេក្ខជនបោះឆ្នោតជ្រើសរើសក្រុមប្រឹក្សារាជធានីភ្នំពេញ

2019-03-26 08:17:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប៉ា សុជាតិវង្ស អតីតអភិបាលរាជធានីភ្នំពេញ បានឈរឈ្មោះជាបេក្ខជនបោះឆ្នោតជ្រើសរើសក្រុមប្រឹក្សារាជធានីភ្នំពេញ លេខរៀងទី១ មកពីគណបក្សប្រជាជនកម្ពុជា។ នេះបើយោងតាមបញ្ជីបេក្ខជនឈរឈ្មោះផ្លូវការរបស់គណៈកម្មាធិការជាតិរៀបចំការបោះឆ្នោត (គ.ជ.ប)។

លោក ប៉ា សុជាតិវង្ស ពេលនៅជាអភិបាលរាជធានីភ្នំពេញ

ក្រៅពីលោក ប៉ា សុជាតិវង្ស គណបក្សប្រជាជនកម្ពជា បានដាក់បេក្ខជនពេញសិទ្ធិ ២៦រូបផ្សេងទៀត និងបេក្ខជនបម្រុង ៣១រូប ប្រចាំមណ្ឌលរាជធានីភ្នំពេញ។

គួររំលឹកផងដែរថា លោក ប៉ា សុជាតិវង្ស បានជាប់ជាតំណាងរាស្រ្ដមណ្ឌលរាជធានីភ្នំពេញ នៅក្នុងការបោះឆ្នោតជ្រើសតាំងតំណាងរាស្រ្ដ នីតិកាលទី៦ ប៉ុន្តែក្រោយមកលោកបានលាលែងពីតំណាងរាស្រ្ដ ជំនួសវិញដោយលោកស្រី គឹម សុវណ្ណា។ ការលាលែងនេះ គឺដោយសារលោកត្រូវទៅកាន់តួនាទីជាប្រធានក្រុមប្រឹក្សារាជធានីភ្នំពេញ និងជាប្រធានគណបក្សប្រជាជនកម្ពុជា រាជធានីភ្នំពេញ។ លោកធ្លាប់កាន់តំណែងជាអភិបាលរាជធានីភ្នំពេញ ពីឆ្នាំ ២០១៣ រហូតដល់ឆ្នាំ ២០១៧។

សូមជម្រាបថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ នឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ ខាងមុខនេះ។ អ្នកមានសិទ្ធិបោះឆ្នោតជ្រើសរើសក្រុមប្រឹក្សានេះ គឺជាសមាជិកក្រុមប្រឹក្សាឃុំ សង្កាត់ នៅក្នុងមុខតំណែង ដែលមានសមាជិកសរុបចំនួន ១១ ៥៧២ នាក់ នៅទូទាំងប្រទេស៕