សម្តេច ហ៊ុន សែន ឱ្យពិនិត្យលើការប្តឹងទៅអង្គការ WTO ជុំវិញការគិតពន្ធអង្ករកម្ពុជារបស់ EU

2019-03-29 04:52:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានជំរុញឱ្យលោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ពិនិត្យអំពីលទ្ធភាពនៃការប្តឹងទៅអង្គការពាណិជ្ជកម្មពិភពលោក (WTO) ជុំវិញការកំណត់យកពន្ធអង្ករកម្ពុជា ពីសំណាក់សហភាពអឺរ៉ុប។ ការថ្លែងនេះ ធ្វើឡើងធ្វើឡើងក្នុងវេទិការាជរដ្ឋាភិបាល-ផ្នែកឯកជនលើកទី១៨ នៅវិមានសន្តិភាព នាព្រឹកថ្ងៃទី២៩ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

ប្រមុខរាជរដ្ឋាភិបាលលើកឡើងថា បញ្ហានៃការកំណត់ពន្ធអង្កររបស់កម្ពុជានេះ គឺមិនពាក់ព័ន្ធនឹងប្រព័ន្ធអនុគ្រោះពន្ធ EBA នោះទេ ប៉ុន្តែគឺពាក់ព័ន្ធទៅនឹងតម្លៃអង្កររបស់អ៊ីតាលី ដែលលក់ថ្លៃជាងអង្ករកម្ពុជា ហើយមិនអាចដណ្តើមឈ្នះកម្ពុជា នៅលើទីផ្សារសហភាពអឺរ៉ុប។ សម្តេចបន្ថែមថា ការយកពន្ធអង្ករកម្ពុជា ក៏នឹងធ្វើឱ្យប៉ះពាល់ដល់ការចំណាយរបស់អ្នកប្រើប្រាស់នៅបណ្តាប្រទេសក្នុងសហភាពអឺរ៉ុបផងដែរ។

សូមរំលឹកថា កាលពីខែមករា ឆ្នាំ២០១៩ សហភាពអឺរ៉ុប បានចាប់ផ្តើមគិតពន្ធលើអង្ករកម្ពុជា ចំនួន៤ប្រភេទ ដែលនឹងធ្វើឱ្យកម្ពុជា ខាតបង់លើការបង់ពន្ធនេះ ប្រមាណ ៥០លានដុល្លារក្នុង១ឆ្នាំ។ EU បានសម្រេចកំណត់ពន្ធតម្លៃ ១៧៥អឺរ៉ូ ក្នុងអង្ករ១តោននៅឆ្នាំដំបូង បន្ទាប់មកអត្រាដកហូតពន្ធគយនឹងធ្លាក់ចុះដល់ចំនួន ១៥០អឺរ៉ូនៅឆ្នាំទីពីរ ហើយនៅឆ្នាំទី៣ អត្រាពន្ធគយលើអង្ករនាំចូលពីកម្ពុជា នឹងធ្លាក់ចុះមកនៅត្រឹម១២៥អឺរ៉ូ ហើយនៅឆ្នាំបន្តបន្ទាប់តម្លៃនឹងធ្លាក់ចុះបន្ថែមផងដែរ៕