រាជរដ្ឋាភិបាល សម្រេចបញ្ចប់អាជីវកម្មផ្លូវដែករបស់ក្រុមហ៊ុនរ៉ូយាល់ រេលវេ

2019-03-29 07:01:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានប្រកាសថា រាជរដ្ឋាភិបាលបានសម្រេចបញ្ចប់អាជីវកម្មរបស់ក្រុមហ៊ុនរ៉ូយាល់ រេលវេ ក្នុងប្រតិបត្តិការផ្លូវដែកនៅកម្ពុជា បន្ទាប់ពីក្រុមហ៊ុនរបស់លោកឧកញ៉ា គិត ម៉េង មួយនេះ ខកខានមិនបានអភិវឌ្ឍផ្លូវដែកឱ្យបានល្អប្រសើរជាងនេះ។ ការថ្លែងនេះ ធ្វើឡើងក្នុងវេទិការាជរដ្ឋាភិបាល-ផ្នែកឯកជនលើកទី១៨ នៅវិមានសន្តិភាព នាព្រឹកថ្ងៃទី២៩ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេចបញ្ជាក់ថា ការគ្រប់គ្រងប្រតិបត្តិការផ្លូវដែកត្រូវបានប្រគល់ទៅឱ្យក្រសួងសាធារណការ និងដឹកជញ្ជូនជាបណ្តោះអាសន្ន ដើម្បីរៀបចំនីតិវិធីដំណើរការឡើងវិញ មុននឹងឈានដល់ការដាក់ឱ្យដេញថ្លៃជាសាធារណៈជ្រើសរើសក្រុមហ៊ុនដែលមានសមត្ថភាព និងបទពិសោធន៍គ្រប់គ្រាន់ ដើម្បីធ្វើឱ្យប្រព័ន្ធផ្លូវដែកនៅកម្ពុជា មានលក្ខណៈស្តង់ដារអន្តរជាតិ និងលក្ខណៈទំនើបជឿនលឿន សម្រាប់ដឹកជញ្ជូនទំនិញ និងអ្នកដំណើរប្រកបដោយភាពជឿជាក់ សុវត្ថិភាព និងថ្លៃសេវាសមរម្យ ដែលនឹងក្លាយជាឆ្អឹងខ្នងសេដ្ឋកិច្ចជាតិដ៏សំខាន់។

ប្រមុខរាជរដ្ឋាភិបាល បានថ្លែងថា ក្នុងរយៈពេលជិត ១០ឆ្នាំមកនេះ វិស័យដឹកជញ្ជូនផ្លូវដែក ហាក់មិនទាន់ទទួលជោគជ័យប្រសើរនៅឡើយទេ បើទោះជាក្រសួងសាធារណការ ខិតខំប្រឹងប្រែងលើកទឹកចិត្តផ្សព្វផ្សាយពីវិស័យនេះយ៉ាងណាក៏ដោយ។ ក្រុមហ៊ុន រ៉ូយាល់ រេលវេ មិនបានពង្រីកសក្តានុពលរបស់ខ្លួន និងមិនបានដាក់ទុនលើក្បាលរថភ្លើង ទូរថភ្លើង គ្រឿងបរិក្ខារនានា ដើម្បីបំពេញតម្រូវការអតិថិជន ដែលរួមមានដូចជា ក្រុមហ៊ុនដឹកជញ្ជូន ក្រុមហ៊ុននាំចេញនាំចូល ពាណិជ្ជករ កសិករ និងអ្នកដំណើរជាដើម។

សម្តេចនាយករដ្ឋមន្រ្តីបន្តថា ជារឿយៗមានរថភ្លើងមួយចំនួនខូច គាំង មិនដំណើរការ ដោយមិនមានថវិកាគ្រប់គ្រាន់ជួសជុល ថែទាំ និងការវិនិយោគបន្ថែម ដែលជាហេតុធ្វើឱ្យមានការខកខានក្នុងការដឹកទំនិញ ឱ្យទាន់ពេល និងធ្វើឱ្យមានការផ្តល់សេវា មានភាពមិនទៀងទាត់។ ទាំងនេះ គឺជាបញ្ហាប្រឈមធំ ដែលចាំបាច់ត្រូវដោះស្រាយ ដើម្បីឱ្យមានការរីកចម្រើនលើសេវាដឹកជញ្ជូនតាមរថភ្លើងនៅកម្ពុជា ហើយក៏ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ និងពាណិជ្ជករផងដែរ។

ជុំវិញការសម្រេចនេះ សម្តេចតេជោ បញ្ជាក់នៅចំពោះមុខលោក ឧកញ៉ា គិត ម៉េង ថាវាមិនមែនជាទណ្ឌកម្មនោះទេ ផ្ទុយទៅវិញ វាគឺជាការជួយមិនឱ្យក្រុមហ៊ុនជួបការដួលរលំ៕

អត្ថបទ៖ សំភី