ព្រះមហាក្សត្រ កោតសរសើររដ្ឋសភា ដែលខិតខំដោះស្រាយរាល់បញ្ហា មិនគិតពីការនឿយហត់

2019-04-01 02:51:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះករុណា ព្រះបាទសម្តេច ព្រះបរមនាថ នរោត្តម-សីហមុនី ព្រះមហាក្សត្រនៃព្រះរាជាណាចក្រកម្ពុជា បានកោតសរសើរចំពោះប្រធាន អនុប្រធាន ប្រធានគណៈកម្មការ និងសមាជិកនៃរដ្ឋសភាទាំងអស់ ដែលបានបំពេញការងារអស់ពីកម្លាំងពីកាយចិត្ត ពុំគិតពីការនឿយហត់ ខិតខំយកចិត្តទុកដាក់ ក្នុងការបម្រើដល់ប្រជាពលរដ្ឋ និងបានដោះស្រាយនូវរាល់បញ្ហាប្រឈមនានា បានដោយជោគជ័យតាមលំដាប់លំដោយ។ នេះបើតាមព្រះរាជសារព្រះមហាក្សត្រ ក្នុងឱកាសបើកបវេសនកាលនៃរដ្ឋសភា សម័យប្រជុំរដ្ឋសភាលើកទី២ នីតិកាលទី៦ នៅថ្ងៃទី១ ខែមេសា ឆ្នាំ២០១៩។

ក្នុងព្រះរាជសារនេះ បញ្ជាក់ថា រយៈកាលកន្លងមកនេះ រដ្ឋសភាបានយកចិត្តទុកដាក់ សហការជាមួយរាជរដ្ឋាភិបាល ធានាការពារនូវសន្តិភាព ស្ថិរភាព សន្តិសុខ និងសុវត្ថិភាព សម្រាប់ការរស់នៅដោយសុខក្សេមក្សាន្តរបស់ប្រជាពលរដ្ឋគ្រប់ទិសទីក្នុងផ្ទៃប្រទេស និងប្រឹងប្រែងបន្តអភិវឌ្ឍសេដ្ឋកិច្ច និងសង្គមគ្រប់វិស័យដោយផ្តោតជាអាទិភាព ទៅលើការកែទម្រង់អភិបាលកិច្ចល្អ ការកសាង សមត្ថភាព អភិវឌ្ឍធនធានមនុស្ស និងការវិនិយោគលើហេដ្ឋារចនាសម្ព័ន្ធ ដើម្បីជំរុញលើកកម្ពស់ និងកែលម្អជីវភាពប្រជាពលរដ្ឋ ឱ្យកាន់តែប្រសើរឡើង និងពង្រឹងប្រព័ន្ធគាំការពារសង្គម សម្រាប់ប្រជាពលរដ្ឋគ្រប់រូប ពិសេសអ្នកក្រីក្រ និងជនងាយរងគ្រោះ។

ព្រះរាជសារដដែលបន្តថា ការខិតខំប្រឹងប្រែងរបស់សមាជិកនៃរដ្ឋសភាគ្រប់រូប គឺជាសកម្មភាពបម្រើប្រជាពលរដ្ឋ ដែលភារកិច្ចនេះ រួមមានការអញ្ជើញយ៉ាងសកម្មចុះសួរសុខទុក្ខ ជួយដោះស្រាយបញ្ហាប្រជារាស្រ្តជាម្ចាស់ឆ្នោត នៅតាមមូលដ្ឋាន ព្រមទាំងទទួលយកនូវរាល់បញ្ហាកង្វល់ និងបញ្ហាប្រឈមនានា មកជម្រាបជូនរាជរដ្ឋាភិបាល ដើម្បីរិះរកវិធានការដោះស្រាយជាបន្ទាន់រាល់បញ្ហាទាំងឡាយនោះ៕

អត្ថបទ៖ សោភា