ក្រសួងការពារជាតិ ប្រាប់កងទ័ពឱ្យប្រុងប្រយ័ត្នចំពោះការប្រើប្រាស់ហ្វេសប៊ុក

2019-04-04 09:41:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនាំពាក្យក្រសួងការពារជាតិ បានអំពាវនាវឱ្យកងយោធពលខេមរភូមិន្ទទាំងអស់ មានការប្រុងប្រយ័ត្ន ក្នុងការប្រើប្រាស់បណ្តាញសង្គមនានា ដោយរក្សាការពារសន្តិសុខ ការងារសម្ងាត់របស់អង្គភាព ហើយបានអំពាវនាវឱ្យប្រជាពលរដ្ឋត្រូវមានទំនុកចិត្តមកលើកងយោធពលខេមរភូមិន្ទ។ នេះបើតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិ នៅថ្ងៃទី៤ ខែមេសា ឆ្នាំ២០១៩។

ការចេញសេចក្តីប្រកាសព័ត៌មាននេះ ខណៈដែលកាលពីពេលថ្មីៗនេះ មានជនទុច្ចរិតមួយចំនួនបានបង្កើតហ្វេសប៊ុក បន្លំយករូបនាយទាហានមួយចំនួន ទៅប្រើប្រាស់ដើម្បីបង្ហោះរូបភាព និងខ្លឹមសារ ញុះញង់វាយប្រហារមកលើរាជរដ្ឋាភិបាលកម្ពុជា។ ក្រសួងការពារជាតិ បានចាត់ទុកថា សកម្មភាពទាំងនេះ គឺជាអំពើខុសច្បាប់ ដែលមិនអាចអត់ឱនឱ្យបានឡើយ ហើយស្នើឱ្យស្ថាប័នមានសមត្ថកិច្ច ចាត់វិធានការតាមផ្លូវច្បាប់ឱ្យបានម៉ឺងម៉ាត់បំផុត។

អ្នកនាំពាក្យក្រសួងការពារជាតិ បានបញ្ជាក់ថា កងយោធពលខេមរភូមិន្ទ រក្សាជំហរស្មោះត្រង់ ការពាររាជរដ្ឋាភិបាលស្របច្បាប់ និងសុខសន្តិភាពរបស់ប្រជាពលរដ្ឋ។ កងយោធពលខេមរភូមិន្ទ ប្រឆាំងដាច់ខាតចំពោះការប៉ុនប៉ង បង្កភាពវឹកវរដល់សង្គម ក៏ដូចជាការបំផ្លាញដល់សន្តិភាពរបស់ប្រទេស៕

អត្ថបទ៖ សំភី