លោក ហ៊ុន ម៉ាណែត ធ្វើទស្សនកិច្ចនៅទីភ្នាក់ងារឈ្លើយសឹក-យុទ្ធជនបាត់ខ្លួនក្នុងសង្គ្រាម នៅអាមេរិក
- 2019-04-12 09:58:26
- ចំនួនមតិ 0 | ចំនួនចែករំលែក 0
លោក ហ៊ុន ម៉ាណែត ធ្វើទស្សនកិច្ចនៅទីភ្នាក់ងារឈ្លើយសឹក-យុទ្ធជនបាត់ខ្លួនក្នុងសង្គ្រាម នៅអាមេរិក
ចន្លោះមិនឃើញ
នៅទីភ្នាក់ងារឈ្លើយសឹក និងយុទ្ធជនបាត់ខ្លួនក្នុងសង្គ្រាម នៃក្រសួងការពារជាតិសហរដ្ឋអាមេរិក កាលពីរសៀលថ្ងៃទី១០ ខែមេសា ឆ្នាំ២០១៩ លោក ស្គុត អ៉ីបែល (Scott Ebell) នាយករដ្ឋបាល និងបុគ្គលិកទីភ្នាក់ងារ បានស្វាគម៍យ៉ាងកក់ក្តៅ និងរីករាយ ចំពោះវត្តមានលោកឧត្តមសេនីយ៍ឯក ហ៊ុន ម៉ាណែត ដែលឆ្លៀតពេលវេលាមកទស្សនកិច្ចដោយផ្ទាល់ ឆ្លើយតបតាមការអញ្ជើញរបស់ទីភ្នាក់ងារ។
លោក Scott Ebell បានសម្តែងអំណរគុណយ៉ាងជ្រាលជ្រៅ ដល់រាជរដ្ឋាភិបាលនៃព្រះរាជាណាចក្រកម្ពុជា ជាពិសេសសម្តេច ហ៊ុន សែន នាយករដ្ឋមន្រ្តីកម្ពុជា ដែលតែងតែគាំទ្រដល់ការងាររុករកអដ្ឋិធាតុ យោធិនសហរដ្ឋអាមេរិកដែលបានបាត់ខ្លួនក្នុងសង្រ្គាមកន្លងមក។ លោក Scott Ebell បានបន្ថែមថា បើគ្មានការគាំទ្រ និងសហការពីសំណាក់ប្រទេសកម្ពុជា កិច្ចការងាររុករកអដ្ឋិធាតុ នឹងមិនបានទទួលជោគជ័យឡើយ។
លោកនាយករដ្ឋបាល និងបុគ្គលិក បានលើកសរសើរប្រទេសកម្ពុជា ដែលតែងតែផ្តល់ការសហការល្អ និងគាំទ្រដល់ក្រុមការងាររុករកអដ្ឋិធាតុយោធិនសហរដ្ឋអាមេរិក ដែលបំពេញបេសកកម្មក្នុងទឹកដីកម្ពុជា ។
លោកឧត្តមសេនីយ៍ឯក បានបញ្ជាក់ថា ប្រមុខរាជរដ្ឋាភិបាលកម្ពុជា តែងតែគាំទ្រដល់កិច្ចការងាររុករកអដ្ឋិធាតុ ពីព្រោះសម្តេចតេជោ យល់ច្បាស់ពីការបាត់បង់សាច់ញាតិនៅក្នុងសង្រ្គាម ហើយដែលកម្ពុជាធ្លាប់ជួបប្រទះ និងឆ្លងកាត់កន្លងមក។ ការបាត់បង់សាច់ញាតិដោយសារសង្រ្គាម ជាការឈឺចាប់មួយទៅហើយ និងការរកមិនឃើញសព ជាការឈឺចាប់របស់សាច់ញាតិមួយកម្រិតបន្ថែមទៀត។
មេបញ្ជាការកងទ័ពជើងគោក បានជម្រាបដល់ទីភ្នាក់នេះថា បើមានសំណូមពរអ្វីក្នុងពេលបំពេញការងារ សូមភាគីមិត្តជូនដំណឹង ដើម្បីភាគីកម្ពុជាអាចនឹងជួយសម្របសម្រួល៕