មេបក្ស​ប្រឆាំង​វេណេហ្ស៊ុយអេឡា សារភាព​ថា​លោក​មិនមាន​យោធា​គ្រប់គ្រាន់​ដើម្បី​ប្រកាស​ជ័យជម្នះ​នៃការ​ធ្វើរដ្ឋប្រហារ​នោះ​ទេ

  • 2019-05-02 02:21:19
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ថ្លែង​ទៅកាន់​ក្រុម​អ្នកគាំទ្រ​កាលពី​ថ្ងៃទី១ ខែ​ឧសភា ឆ្នាំ​២០១៩ មេបក្ស​ប្រឆាំង​វេណេហ្ស៊ុយអេឡា លោក Juan Guaido បាន​សារភាព​ថា លោក​មិន​មាន​យោធា​គ្រប់គ្រាន់​ ដើម្បី​ប្រកាស​ជ័យ​ជម្នះ ក្នុងការ​ធ្វើរដ្ឋប្រហារ​កាលពីចុង​ខែមេសា​នោះ​ឡើយ។

រូបថត៖ CNN
លោក​បាន​បន្ថែម​ថា៖ «យើង​បាន​ទទូចឱ្យ​កងទ័ព​ទាំងអស់​រួមគ្នា។ យើង​មិន​ចង់ឱ្យ​មានការ​ប្រឈមមុខ​ដាក់​គ្នា ក្នុង​ចំណោម​បងប្អូន​នោះទេ។ យើង​គ្រាន់តែ​ចង់​ឱ្យ​ពួកគេ​នៅ​ខាង​ប្រជាជន»។

លោក Juan Guaido បាន​ប្រាប់​ទៅមហាជន​ដែល​គាំទ្រលោក​នៅ​កន្លែង​ធ្វើបាតុកម្ម​ក្នុង​ទីក្រុង​ Caracas ថា «ចាប់ពីពេល​នេះតទៅ យើង​នឹង​បន្តធ្វើការ​តវ៉ា រហូតដល់​សម្រេច​គោលដៅ​របស់​យើង»។

សូម​រំលឹក​ថា កាលពីថ្ងៃទី​៣០ ខែ​មេសាកន្លងទៅ មេបក្ស​ប្រឆាំង​រូបនេះ បាន​បង្ហោះ​នៅលើ​បណ្តាញ​ទ្វីតធើ ដោយប្រកាស​ថា លោក​បាន​ចាប់ផ្តើម​នូវ​ដំណាក់កាល​ចុងក្រោយ​នៃយុទ្ធនាការ​ផ្តួលរំលំ​ប្រធានាធិបតី​ស្របច្បាប់​វេណេហ្ស៊ុយអេឡា លោក Nicolas Maduro ដោយ​អំពាវនាវ​ឱ្យ​ប្រជាជន និង​យោធា​វេណេហ្ស៊ុយអេឡា គាំទ្រ​ខ្លួន ដើម្បី​បញ្ចប់​អំណាច​រដ្ឋាភិបាល​នេះ។ ប៉ុន្តែ​ប៉ុន្មាន​ម៉ោង​ក្រោយពី​ការ​ប្រកាស​នេះ គឺ​គ្មាន​សញ្ញា​នៃសកម្មភាព​យោធា​ណាមួយ​ដែល​គាំទ្រ​លោក Juan Guaido នោះទេ។

លោក Maduro បាន​បញ្ជាក់​នៅ​លើ​បណ្តាញ​ទ្វីតធើ​កាលពី​ថ្ងៃអង្គារ​ដែរ​ថា លោកបាន​និយាយ​ជាមួយ​មេដឹកនាំ​យោធា​ហើយ ដោយ​ពួកគេ​បាន​បង្ហាញ​ពីការ​ស្មោះត្រង់​បំផុត​ចំពោះ​រូបលោក ពោលគឺ​មិន​ចូលរួម​ជាមួយ​មេបក្ស​ប្រឆាំង​ដាច់ខាត។

ក្រុម​អ្នកគាំទ្រ​លោក Juan Guaido បាន​ប្រមូល​ផ្តុំគ្នា​ធ្វើបាតុកម្ម​ទម្លាក់​លោក Maduro នៅ​កណ្តាល​ក្រុង Caracas ប៉ុន្តែ​ត្រូវបាន​រាំងស្កាត់​ដោយ​កម្លាំង​សន្តិសុខ ដែលបាន​បាញ់​ឧស្ម័ន​បង្ហូរ​ទឹកភ្នែក ដើម្បី​បំបែក​ពួកគេ។

រូបថត៖ CNN

រដ្ឋមន្រ្តី​ក្រសួង​ការពារ​ជាតិ​វេណេហ្ស៊ុយអេឡា លោក Vladimir Padrino បាន​និយាយថា៖ «យើងបាន​ច្រានចោល​នូវ​ចលនា​រដ្ឋប្រហារ​នេះ ដែលមាន​បំណង​ធ្វើឱ្យ​ប្រទេស​ធ្លាក់​ចូល​ទៅក្នុង​អំពើ​ហិង្សា»៕

ប្រភព៖ CNN ប្រែ​សម្រួល៖ សំភី

អត្ថបទថ្មី
;