ខែក្ដៅ អ្នកទេសចរសម្រុកទៅលេងរមណីយដ្ឋានតាតៃ ក្នុងខេត្ដកោះកុង

2019-05-05 07:27:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រមណីយដ្ឋានទឹកជ្រោះធម្មជាតិតាតៃ ក្នុងខេត្តកោះកុង ជាទីកន្លែងសម្រាកលម្ហែកម្សាន្ត ដ៏ទាក់ទាញមួយនារដូវក្ដៅនេះ ដោយទទួលបានភ្ញៀវទេសចរជាតិ និងអន្ដរជាតិជាច្រើនមកទស្សនា យ៉ាងហោចណាស់ក៏មានពី ១៥០នាក់ ទៅ២០០នាក់ ក្នុងមួយថ្ងៃៗ។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា AKP នាថ្ងៃទី៤ ខែឧសភានេះ។

លោក ធិន សម្បត្តិ មេឃុំតាតៃ តំណាងឱ្យប្រធានសហគមន៍ទឹកជ្រោះតាតៃ បានឱ្យដឹងថា ក្រោយថ្ងៃបុណ្យចូលឆ្នាំថ្មី រួចមក តាមការសង្កេតឃើញថា មានអ្នកទេសចរជាតិ និងអន្តរជាតិ នៅតែចាប់អារម្មណ៍ទៅលេងសម្រាក លម្ហែកម្សាន្តនៅរមណីយដ្ឋាននេះ ដោយសារវាមានម្លប់ឈើ និងទឹកត្រជាក់ថ្លាយង់គួរឱ្យចង់មុជលេង។ លោកបានបន្ដថា ទីកន្លែងទេសចរណ៍មួយនេះ មានទឹកជ្រោះ សម្រាប់ឱ្យភ្ញៀវមុជលេងកម្សាន្ត អាចជិះទូកទៅលេងចម្ការផ្លែឈើរបស់ប្រជាកសិករតាមដងព្រែកផងដែរ ខណៈរដូវផ្លែឈើដល់ពេលប្រមូលផលនោះ។

សូមរម្លឹកថា កាលពីអំឡុងថ្ងៃបុណ្យឆ្នាំថ្មី ប្រពៃណីជាតិខ្មែរ កន្លងទៅ រមណីយដ្ឋានទឹកជ្រោះតាតៃ បានទទួលភ្ញៀវទេសចរជាង ៤៥០០នាក់ ដែលបានទៅសម្រាកលម្ហែកកម្សាន្តគយគន់ព្រៃឈើតាមដងព្រែកធម្មជាតិ ផ្ទះបណ្តែតទឹក និងមុជទឹកជ្រោះលេងកម្សាន្ដ។ ចំពោះតម្លៃនៃការចូលលេងកម្សាន្តរបស់ភ្ញៀវទេសចរ អាចចំណាយថវិកា ចាប់ពី១៦ដុល្លារឡើងទៅ តាមរយៈទិញសំបុត្រជិះទូក៕