អគ្គស្នងការរង បញ្ជាក់ពីករណីរកឃើញរំសេវ នៅខេត្តកំពង់ធំ

2019-05-09 13:23:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងជាអ្នកនាំពាក្យ បានថ្លែងប្រាប់ [ខ្លីៗ] នៅល្ងាចថ្ងៃទី០៩ ខែឧសភា ឆ្នាំ២០១៩ថា រំសេវដែលរកឃើញនេះ គឺមិនខុសច្បាប់ទេ។ ហើយរំសេវនេះ វាស្ថិតនៅក្នុងដែនអាជីវកម្មរបស់ក្រុមហ៊ុនមួយរបស់ជនជាតិថៃ ដែលបានទទួលអាជ្ញាបណ្ណធ្វើអាជីវកម្មរ៉ែនៅតំបន់នោះ។

លោកបានបញ្ជាក់យ៉ាងដូច្នេះថា៖ «រំសេវនេះ មិនមែនខុសច្បាប់ទេ មានការអនុញ្ញាតត្រួតពិនិត្យត្រឹមត្រូវ ហើយមិនមែនជារបស់ភេរវករណា ឬឧក្រិដ្ឋជនណា ប៉ុនប៉ងយកទៅទុកសម្រាប់ធ្វើសកម្មភាពអ្វីទេ ហើយមិនមែនជារឿងភេរវកម្មទេ គឺរំសេវសម្រាប់យកទៅផ្ទុះធ្វើរ៉ែ ហើយប៉ូលិសកំពុងតែរកអ្នកទទួលខុសត្រូវ»។

សូមរំលឹកថា រំសេវជាតិផ្ទុះជាច្រើនតោន ត្រូវបានរកឃើញនៅក្នុងការដ្ឋានរ៉ែមាសមួយកន្លែងនៅក្នុងកណ្តាលព្រៃ ក្នុងភូមិកំណប់ ឃុំសុចិត្រ ស្រុកសណ្តាន់ ខេត្តកំពង់ធំ កាលពីថ្ងៃទី០៨ ខែឧសភា ឆ្នាំ២០១៩។

បើតាមលោក សុខ លូ អភិបាលខេត្តកំពង់ធំ បានឱ្យដឹងថា រឿងអាជ្ញាបណ្ណនេះ កន្លងមកខេត្តមិនដែលដឹងទេ។ តែការនាំយករំសេវផ្ទុះដើម្បីរុករករ៉ែនេះសុទ្ធតែមានលិខិត ស្នាមច្បាស់លាស់ពីក្រសួងការពារជាតិ។

លោកបន្តថា កន្លងមកគណ:កម្មការចម្រុះបានមកពិនិត្យតំបន់នេះហើយបានធ្វើការ បង្រ្កាបផងដែរនូវកន្លែងរុករកខុសនិយាមការក្នុងអាជា្ញបណ្ណ ហើយបានកម្ទេច និងដឹកវត្ថុតាងទាំងអស់មកហើយ។ តែនៅសល់កុងទឺន័រចាស់មួយនេះប្រហែលជានៅឆ្ងាយ ហើយនៅក្នុងដែនអាជា្ញបណ្ណរបស់ក្រុមហ៊ុន ទើបមិនបានពិនិត្យ។

លោកអភិបាលខេត្តបញ្ជាក់ថា រំសេវនេះ ត្រូវដឹកមករក្សាទុកនៅតំបន់ប្រតិបត្តិការសឹករងខេត្តដើម្បីធានាសុវត្ថិភាព៕