លាមកគោនៅខេត្តព្រៃវែង កំពុងមានហាងឆេង នាំចេញទៅវៀតណាមរាល់ថ្ងៃ

2019-05-21 02:03:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មិនអត់ប្រយោជន៍ចំពោះកសិករទេ ដែលចិញ្ចឹមសត្វគោក្របីយកសាច់លក់ ព្រោះលាមករបស់វាក៏អាចលក់បានលុយរាល់ថ្ងៃផងដែរ។ ជាក់ស្ដែង តាមភូមិឃុំមួយចំនួននៅក្នុងខេត្តព្រៃវែង កសិករបានប្រមូលលាមកគោក្របី យកទៅលក់ឲ្យឈ្មួញដឹកចេញទៅវៀតណាមរៀងរាល់ថ្ងៃ។

លោកស្រី យឿន ណាក់ រស់នៅភូមិមុនីសិលា ឃុំបន្ទាយចក្រី ស្រុកព្រះស្តេច បានឲ្យដឹងថា រាល់ថ្ងៃអ្នកស្រី ចិញ្ចឹមគោយកសាច់លក់ និងយកអាចម៍គោលក់។ អ្នកស្រីបន្តថា បច្ចុប្បន្នផ្ទះអ្នកស្រីចិញ្ចឹមសត្វគោចំនួន ៦ក្បាល។ ជាមធ្យមអាចបានប្រាក់ចំណូលពីលាមកគោចំនួន ៣០០០រៀលក្នុងមួយថ្ងៃ។ ជារៀងរាល់ថ្ងៃ សត្វគោរបស់គាត់ ទាំងនេះបានយកទៅឃ្វាលនៅតាមវាលស្រែ ក្បែរៗភូមិ។ ព្រឹកចេញទៅវាលស្រែ លុះព្រលប់ឬល្ងាចកៀងបញ្ចូលក្រោលវិញនៅក្រោមផ្ទះ។ សម្រាប់គោ ៦ក្បាល នៅក្នុងមួយថ្ងៃគាត់ អាចប្រមូលអាចម៍គោស្ងួតបានមួយបាវ។ តម្លៃ៣០០០រៀល ដែលឈ្មួញគេមកប្រមូលទិញ នាំចេញទៅវៀតណាម។ ពោលគឺ៥ទៅ៧ថ្ងៃ ទើបគាត់លក់អាចម៍គោចេញម្ដង គ្រាន់បានលុយទិញម្ហូបប្រចាំថ្ងៃ។

អ្នកស្រីបញ្ជាក់ថា វាមិនស្រួលប៉ុន្មានដែរទេ ទម្រាំបានអាចម៍គោលក់នោះ គឺមុនដំបូងយើងកើបអាចម៍គោ ដែលវាជុះរួច មកដាក់ហាលលើដី ឬលើកន្ទេល ឲ្យស្ងួតបន្ទាប់មកទើបយើងប្រមូលច្រកចូលបាវទុកលក់ឲ្យឈ្មួញ។ និយាយរួមអ្នកចិញ្ចឹមគោច្រើន គឺបានលាមកច្រើនសម្រាប់លក់ មិនបោះចោលលាមកដូចមុនទេ។

ដោយឡែកអាជីវករអ្នកដើរទិញអាចម៍គោម្នាក់បានថ្លែងថា ខ្លួនតែងតែដើរទិញលាមកគោក្របី យកទៅវៀតណាមជាប្រចាំ។ ក្នុងនោះ ទិញពីកសិករមួយបាវ ៣០០០រៀល ដល់ទៅលក់ឲ្យឈ្មួញវៀតណាម នៅច្រកអន្តរជាតិបន្ទាយចក្រី ស្រុកព្រះស្ដេច បានមួយបាវ ៤០០០រៀល។ អាជីវករដដែលបន្តថា ជារៀងរាល់លើក ពីរទៅបីថ្ងៃ ទើបខ្លួនដឹកទៅលក់ឲ្យឈ្មួញវៀតណាមម្ដង ព្រោះរវល់ដើរប្រមូលទិញទម្រាំពេញរថយន្ត។ ក្នុងនោះ ក៏មានឈ្មួញជាច្រើននាក់បានដើរទិញអាចម៍គោរាល់ថ្ងៃ ខ្លះទិញដឹកតាមគោយន្តកន្ត្រៃ ខ្លះដឹកតាមរ៉ឺម៉កម៉ូតូ ខ្លះដឹកតាមរថយន្តតូចធំគ្រប់ប្រភេទ។

កន្លងមកឈ្មួញវៀតណាម បានប្រាប់មកអាជីវករខ្មែរថា អាចម៍គោទាំងនោះ គេយកទៅធ្វើជីធម្មជាតិសម្រាប់ដាំដំណាំផ្សេង ដូចជាឪឡឹក ត្រសក់ ល្ហុង ដូង ស្វាយក្រូច និងបន្លែគ្រប់មុខដែលកសិករវៀតណាម គេច្នៃប្រើប្រាស់តាមតម្រូវការនៃរុក្ខជាតិនៅក្នុងចម្ការរបស់ពួកគេ៕