សញ្ញាមួយចំនួន បញ្ជាក់ថាហ្រ្វាំងរថយន្តកំពុងមានបញ្ហា

2019-05-30 03:48:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ហ្វ្រាំង ជាប្រព័ន្ធសុវត្ថិភាពមួយដ៏សំខាន់លើរថយន្ត ហើយបើបញ្ហាកើតឡើង អាចបង្កគ្រោះថ្នាក់។ មានសញ្ញាមួយចំនួនដែលអាចឲ្យយើងដឹងថាប្រព័ន្ធហ្វ្រាំងមានបញ្ហា។

លោក អ៊ុយ សាខន ជាគ្រូជំនាញគ្រឿងក្រោមរថយន្តបង្រៀននៅសាលាបច្ចេកទេសជួសជុលរថយន្ត JVC បានប្រាប់ថា ប្រព័ន្ធហ្វ្រាំងរថយន្តមានបញ្ហា បើមានសញ្ញាបង្ហាញមួយចំនួនដូចខាងក្រោម៖

នៅពេលអ្នកកំពុងបើកបរ ឮសូរសំឡេងកកិតគ្នាង៉ឺតៗពេលជាន់ហ្រ្វាំង ហាក់ដូចជាមានអ្វីដែលជាប់ថាសហ្វ្រាំង។
ចង្កូតរថយន្តងាករេ ដែលអាចដឹងភ្លាមនៅពេលអ្នកកាន់ដៃចង្កូតបើកបរក្នុងល្បឿនលឿននៅលើផ្លូវរាបស្មើ។
ឈ្នាន់ហ្រ្វាំងទាបស្ទើរតែប៉ះកម្រាលរថយន្ត នៅពេលជាន់ហ្រ្វាំងជាសញ្ញាណបង្ហាញថាស្បែកហ្វ្រាំងអស់គុណភាព។
ឈ្នាន់ហ្រ្វាំងរឹងដោយត្រូវប្រើកម្លាំងខ្លាំងជាន់ឲ្យស៊ី ឬនៅពេលជាន់ទៅហ្វ្រាំងធូរមិនរលាស់មកវិញ អាចបញ្ជាក់ថាហ្វ្រាំងរថយន្តងាប់ ឬស្ងួតប្រេងរំអិល។
នៅពេលយកជើងជាន់ឈ្នាន់ហ្វ្រាំងរថយន្ត មានរំញ័បើទោះជាស្ថិតក្នុងលក្ខខណ្ឌជាន់ហ្រ្វាំងធម្មតា ឬក៏ស្ថិតនៅលើស្ថានភាពផ្លូវរាបស្មើក៏ដោយ។
កង់រថយន្តឡើងកម្ដៅក្រោយពេលបើកបរ បើទោះបើកបរក្នុងរយៈចម្ងាយជិតក៏ដោយ នេះមកពីស្បែកហ្វ្រាំងកកិតថាសហ្វ្រាំងរហូត។
បើសិនជាភ្លើងសញ្ញាលោតនៅលើតាប្លូ ក៏អាចបង្ហាញថាហ្រ្វាំងមានបញ្ហាដែរ ។

ទាំងនេះជាសញ្ញាមួយចំនួនដែលអ្នកបើកបររថយន្តគួរត្រួតពិនិត្យភ្លាមៗ ដើម្បីការពារសុវត្ថិភាពអ្នកគួរឈប់ឡានជាបន្ទាន់ នៅពេលមានសញ្ញាទាំងនេះដើម្បីហៅអ្នកជំនាញយកត្រួតពិនិត្យឬយកទៅការាសជាបន្ទាន់៕

អត្ថបទ៖ ម៉េងងី