កូរ៉េខាងជើង ប្រហារជីវិតមន្រ្តីដែលធ្វើការងារបរាជ័យ ក្នុងជំនួប ដូណាល់ ត្រាំ-គីម ជុងអ៊ុន

2019-05-31 07:52:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កូរ៉េខាងជើង បានកាត់ទោសប្រហារជីវិតលោក Kim Hyok Chol បេសកជនពិសេសរបស់កូរ៉េខាងជើង ប្រចាំសហរដ្ឋអាមេរិក និងមន្រ្តីក្រសួងការបរទេសមួយចំនួន ដែលធ្វើការពាក់ព័ន្ធនឹងកិច្ចចរចាសម្រាប់ជំនួបលើកទី២ រវាង ប្រធានាធិបតីអាមេរិក លោក ដូណាល់ត្រាំ និងមេដឹកនាំកូរ៉េខាងជើង លោក គីម ជុងអ៊ុន។ ជំនួបកំពូលនេះ ធ្វើឡើងកាលពីចុងខែកុម្ភៈ នៅក្រុងហាណូយ ប្រទេសវៀតណាម ប៉ុន្តែមិនទទួលបានផ្លែផ្កាអ្វីឡើយ។

រូបថត៖ Reuters

យោងតាមការចុះផ្សាយរបស់កាសែតកូរ៉េខាងត្បូង Chosun Ilbo នៅថ្ងៃទី៣១ ខែឧសភា ឆ្នាំ២០១៩ ដែលបានដកស្រង់ចេញពីប្រភពកូរ៉េខាងជើង (មិនបញ្ចេញឈ្មោះ) ឱ្យដឹងថា លោក Kim Hyok Chol ត្រូវបានស៊ើបអង្កេត ហើយត្រូវប្រហារជីវិតនៅព្រលានយន្តហោះ Mirim ជាមួយមន្រ្តីក្រសួងការបរទេសកូរ៉េខាងជើង ៤រូបទៀត កាលពីខែមីនាកន្លងទៅ។ ពួកគេត្រូវបានចោទប្រកាន់ពីបទធ្វើចារកម្មឱ្យអាមេរិក។

កាសែតដដែលនេះបានរាយការណ៍ថា ក្រៅពីមន្រ្តីខាងលើដែលត្រូវប្រហារជីវិត ក៏មានមន្រ្តីផ្សេងទៀតត្រូវឃុំខ្លួន និងបញ្ឈប់ពីការងារផងដែរ ក្នុងនោះមានដូចជា៖

-លោក Kim Yong Chol ជាមន្រ្តីជាន់ខ្ពស់កូរ៉េខាងជើងម្នាក់ដែលបានបើកកិច្ចចរចាជាមួយរដ្ឋមន្រ្តីការបរទេសអាមេរិក លោក Mike Pompeo មុនជំនួបកំពូលត្រាំ-គីម។ លោកត្រូវបានបង្ខំឱ្យទៅធ្វើការយ៉ាងធ្ងន់ធ្ងរនៅខេត្ត Jagan បន្ទាប់ពីត្រូវបានបញ្ឈប់ពីតំណែង។

-លោកស្រី Kim Song Hye ដែលបានចូលរួមការងារក្នុងកិច្ចចរចានេះជាមួយលោក Kim Hyok Chol ក៏ត្រូវបានបញ្ជូនទៅឃុំខ្លួនក្នុងគុកនយោបាយមួយផងដែរ។

-លោកស្រី Shin Hye Yong ដែលជាអ្នកបកប្រែឱ្យលោក គីម ជុងអ៊ុន ក្នុងអំឡុងជំនួបជាមួយលោក ដូណាល់ ត្រាំ ត្រូវបានឃុំខ្លួននៅក្នុងគុកនយោបាយមួយ ដោយចោទថា មានកំហុសក្នុងការបកប្រែ។

-អ្វីដែលគួរឱ្យកត់សម្គាល់នោះ លោកស្រី Kim Yo Jong ជាប្អូនស្រី និងជាជំនួយការរបស់លោក គីម ជុងអ៊ុន ក្នុងជំនួបកំពូលនោះ ត្រូវបានទម្លាក់ឋានៈទៀតផង៕

ប្រភព៖ Channelnewsasia ប្រែសម្រួល៖ សំភី