រដ្ឋមន្រ្តី​សិង្ហបុរី ប្រាប់​លោក ហ៊ុន ម៉ាណែត ថា «ប្រទេស​សិង្ហបុរី និង​កម្ពុជា គឺជា​មិត្តចាស់»

  • 2019-06-12 03:02:01
  • ចំនួនមតិ 0 | ចំនួនចែករំលែក 0

ចន្លោះមិនឃើញ


លោក​បណ្ឌិត វីវៀន បាឡាគ្រីសស្នាន់ (Vivian Balakrishnan) រដ្ឋមន្រ្តី​ក្រសួង​ការបរទេស​សិង្ហបុរី បាន​បញ្ជាក់​ថា ប្រទេស​សិង្ហបុរី និង​ប្រទេស​កម្ពុជា ជា​មិត្តចាស់ និង​មាន​ទំនាក់ទំនង​ដែល​ផ្តល់ផល​ប្រយោជន៍​ឱ្យគ្នា​ទៅវិញ​ទៅមក។ ប្រទេស​ទាំងពីរ ត្រូវតែ​សហការគ្នា​ទាំងក្នុង​កម្រិត​ទ្វេភាគី និងក្នុង​នាម​សមាជិក​អាស៊ាន​ ក្នុងការ​រក្សា​សនិ្តសុខ និង​ស្ថិរភាព​នៅក្នុង​តំបន់។

ការ​ថ្លែង​ខាងលើនេះ ធ្វើឡើង​ក្នុង​ជំនួប​ពិភាក្សា​រវាង​លោក វីវៀន បាឡាគ្រីសស្នាន់ និង​លោក​ឧត្តមសេនីយ៍​ឯក ហ៊ុន ម៉ាណែត អគ្គ​មេបញ្ជាការរង​នៃ​កងយោធពល​ខេមរភូមិន្ទ និងជា​មេបញ្ជាការ​កងទ័ព​ជើងគោក កាលពី​រសៀល​ថ្ងៃទី​១១ ខែ​មិថុនា ឆ្នាំ​២០១៩ នៅ​ប្រទេស​សិង្ហបុរី។

រូបថត៖ ហ្វេសប៊ុកលោក ហ៊ុន ម៉ាណែត
ក្នុងជំនួប​នេះ លោក វីវៀន បាឡាគ្រីសស្នាន់ បាន​សម្តែង​ការ​អបអរសាទរ​ជូនចំពោះ ឧត្តមសេនីយ៍​ឯក ហ៊ុន ម៉ាណែត ដែលត្រូវបាន​ព្រះមហាក្សត្រ​នៃព្រះរាជាណាចក្រ​កម្ពុជា ត្រាស់បង្គាប់​តែងតាំង​ជា​អគ្គ​មេបញ្ជាការ​រង​នៃ​កង​យោធពលខេមរភូមិន្ទ និងជា​មេបញ្ជាការ​កងទ័ព​ជើងគោក។

ជាការ​ឆ្លើយតប​ ឧត្តមសេនីយ៍ឯក ហ៊ុន ម៉ាណែត បាន​គាំទ្រ​យោបល់​របស់​លោករដ្ឋមន្រ្តី​ក្រសួង​ការបរទេស​សិង្ហបុរី ដែលបាន​បញ្ជាក់ពី​សារៈសំខាន់​នៃ​កិច្ច​ទំនាក់ទំនង​រវាង​ប្រទេស​ទាំងពីរ​ក្នុងការ​រក្សា​សន្តិសុខ និង​ស្ថិរភាព​ក្នុង​តំបន់។

រូបថត៖ ហ្វេសប៊ុកលោក ហ៊ុន ម៉ាណែត

មេបញ្ជាការ​កងទ័ពជើងគោក​កម្ពុជា បាន​បន្ថែម​ថា សហគមន៍​អាស៊ាន​ត្រូវតែ​នៅជា​ធ្លុងមួយ ដើម្បី​ការ​អភិវឌ្ឍ ការ​រីកចម្រើន វិបុលភាព និង​និរន្តភាព​ក្នុង​តំបន់។ លោក​ ហ៊ុន ម៉ាណែត បន្តថា ដំណើរ​ទស្សនកិច្ច​នេះ នឹង​បន្តរឹតចំណង​មិត្តភាព​រវាង​ប្រទេស​ទាំងពីរ​បន្ថែម​ទៀត៕

អត្ថបទ៖ សោភា

អត្ថបទថ្មី
;