លោក ឃួង ស្រេង៖ ការបំបែកខណ្ឌថ្មី មិនមែនដើម្បីចែកអំណាចគ្នាទេ

2019-06-21 06:46:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ឃួង ស្រេង អភិបាលរាជធានីភ្នំពេញ បានបញ្ជាក់ថា ការបំបែកខណ្ឌថ្មី មិនមែនជាការបែងចែកអំណាចនោះទេ តែដើម្បីបង្កភាពងាយស្រួល ក្នុងការផ្តល់សេវា និងដោះស្រាយបញ្ហា ឲ្យប្រជាពលរដ្ឋ ក្នុងមូលដ្ឋានកាន់តែល្អប្រសើរប៉ុណ្ណោះ។ ការថ្លែងនេះ ធ្វើឡើងនាព្រឹកថ្ងៃទី២១ ខែមិថុនា ឆ្នាំ២០១៩ ក្នុងពិធីប្រកាសស្តីពីការបង្កើត និងដាក់ឲ្យដំណើរការរដ្ឋបាលខណ្ឌកំបូល។

រូបថត៖ រដ្ឋបាលរាជធានីភ្នំពេញ

លោកពន្យល់ថា ដោយសារខណ្ឌពោធិ៍សែនជ័យ និងខណ្ឌដង្កោធំ តែការផ្តល់សេវាសាធារណៈ ក៏ដូចជាការដោះស្រាយបញ្ហាជូនប្រជាពលរដ្ឋ មិនសូវទាន់ពេលវេលា ទើបត្រូវរៀបចំបំបែកខណ្ឌថ្មីបន្ថែម ដែលនេះជាគោលការណ៍ របស់រាជរដ្ឋាភិបាល ក៏ដូចជាក្រសួងមហាផ្ទៃ ។

«បងប្អូនប្រជាពលរដ្ឋ ខណ្ឌពោធិ៍សែនជ័យធំ ដង្កោក៏ធំ ពេលខ្លះមកមិនសូវដល់ទេ នៅក្នុងខណ្ឌ មានអភិបាលខណ្ឌ១ មានអភិបាលរងខណ្ឌ៤ ពេលខ្លះគេហៅប្រជុំអស់រលីងពីខណ្ឌ។ អ៊ីចឹងអត់មានអ្នកចុះ ពឹងទៅលើក្រុមប្រឹក្សាសង្កាត់ ក្រុមប្រឹក្សាសង្កាត់ ត្រូវរៀបចំមូលដ្ឋានរបស់ខ្លួន ធ្វើរបាយការណ៍ទៅខណ្ឌ។ អ៊ីចឹងការបំបែកខណ្ឌនេះ ដោយសារចង់ ឲ្យអភិបាលនៃគណៈអភិបាលខណ្ឌនេះ ក៏ដូចជាក្រុមប្រឹក្សា បានចុះទៅខិតជិតជាមួយប្រជាពលរដ្ឋ ក្តាប់បញ្ហាឲ្យទាន់ពេលវេលា ហើយដោះស្រាយជូនគាត់បានល្អប្រសើរ នេះជាចំណុចសំខាន់ ជាគោលការណ៍របស់រាជរដ្ឋាភិបាល»។ នេះជាការលើកឡើងបន្ថែមរបស់លោកអភិបាលរាជធានីភ្នំពេញ។

សូមជម្រាបថា លោក ឃឹម ស៊ុនសូដា ជាអភិបាលខណ្ឌកំបូល ត្រូវបានប្រកាស ចូលកាន់តំណែងជាផ្លូវការ កាលពីថ្ងៃទី២២ ខែមេសា ឆ្នាំ២០១៩ នៅសាលារាជធានីភ្នំពេញ។ ខណ្ឌកំបូល ត្រូវបានបំបែកចេញ ពីខណ្ឌពោធិ៍សែនជ័យ និងខណ្ឌដង្កោ ។ ខណ្ឌថ្មីនេះ មាន៧សង្កាត់ គឺសង្កាត់កំបូល កន្ទោក ស្នោ ភ្លើងឆេះរទេះ ប្រទះឡាង ឪឡោក និងសង្កាត់បឹងធំ៕

ប្រភព៖ ដើមអម្ពិល