គ្រឿងញៀន​ចំនួន​ជាង ២​ពាន់​គីឡូក្រាម ត្រូវបាន​ដុតបំផ្លាញ​ចោល​នាព្រឹក​ថ្ងៃទី២៦ ខែ​មិថុនា ឆ្នាំ​២០១៩​នេះ នៅ​កោះពេជ្រ ក្រោម​អធិបតីភាព​សម្ដេច​ក្រឡាហោម​ស ខេង ឧបនាយករដ្ឋមន្ត្រី​ រដ្ឋមន្ត្រី​ក្រសួង​មហាផ្ទៃ និងជា​ប្រធាន​យុទ្ធនាការ​ប្រយុទ្ធ​ប្រឆាំង​គ្រឿងញៀន។ ការដុត​បំផ្លាញ​ចោលនូវ​គ្រឿងញៀន​នេះ​គឺ​នៅក្នុង​ទិវាអន្តរជាតិ​ប្រយុទ្ធប្រឆាំង​គ្រឿងញៀន។

លោក កែវ សុធា ព្រះរាជអាជ្ញា​អម​សាលា​ដំបូងរាជធានីភ្នំពេញ បាន​ថ្លែង​បញ្ជាក់​ក្នុង​ពិធី​នេះ​ថា ករណី​ពាក់ព័ន្ធ​នឹង​សំណុំ​រឿង​គ្រឿងញៀន ក្នុង​រយៈពេល៣​ឆ្នាំ គិតចាប់​ពីខែ​មិថុនា​ឆ្នាំ​២០១៧ មកដល់​ខែ​មិថុនា​ឆ្នាំ​២០១៩ មាន​ដូច​តទៅ៖

-ករណីជួញដូរគ្រឿងញៀនខុសច្បាប់ចំនួន ២. ០២៥សំណុំរឿង។

-ករណីរក្សាទុកគ្រឿងញៀនខុសច្បាប់ចំនួន ១.១៧៥សំណុំរឿង។

-ករណីចាត់ចែងនិងសម្រួលឲ្យប្រើប្រាស់ គ្រឿងញៀនខុសច្បាប់ចំនួន ១១៣សំណុំរឿង។

-ករណីប្រើប្រាស់គ្រឿងញៀនខុសច្បាប់ចំនួន ៣.៥១៧សំណុំរឿង។

លោកបាន​បញ្ជាក់​ថា ករណី​ពាក់ព័ន្ធ​គ្រឿងញៀន​ខុសច្បាប់​ដែលសមត្ថកិច្ច​ធ្វើការបង្ក្រាប​ក្នុងរយៈពេល ២ឆ្នាំ​កន្លងទៅ សរុប​មាន​ចំនួន ៦៨៣០សំណុំរឿង។ ក្នុងនោះ​ដកហូត​និងរឹបអូស​សារធាតុញៀន​សុទ្ធចំនួន ៤២០​គីឡូក្រាម គ្រឿងញៀន​ពាក់ព័ន្ធ​រួមទាំង​សារធាតុ​ផ្សំ​គ្រឿងញៀន​ចំនួន ១៩៤១,៣៣គីឡូក្រាម សរុប​ទាំងអស់​ដែលតម្រូវដុត​បំផ្លាញចោល​នាពេលនេះ​មានចំនួន ២៣៦១,៣៣​គីឡូក្រាម៕