ការទិញ F-35 ពីអាមេរិករបស់កូរ៉េខាងត្បូង នឹងបង្ខំឱ្យកូរ៉េខាងជើង ធ្វើតេស្តអាវុធពិសេស ដើម្បីកម្ទេចចោល

2019-07-12 03:43:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការទិញយន្តហោះបំបាំងកាយ F-35 ពីអាមេរិករបស់កូរ៉េខាងត្បូង នឹងបង្ខំឱ្យប្រទេសកូរ៉េខាងជើង អភិវឌ្ឍ និងធ្វើតេស្តអាវុធពិសេស ដើម្បីកម្ទេចសព្វាវុធនេះចោល។ នេះបើតាមការចុះផ្សាយរបស់សារព័ត៌មានខាងជើង KCNA កាលពីថ្ងៃទី១១ ខែកក្កដា ឆ្នាំ២០១៩។

រូបថត៖ Reuters

នាយកស្រាវជ្រាវគោលនយោបាយ១រូបនៅវិទ្យាស្ថានសម្រាប់ការសិក្សាសហរដ្ឋអាមេរិក នៃក្រសួងការបរទេសកូរ៉េខាងជើង បានលើកឡើងក្នុងសេចក្តីថ្លែងការណ៍ថា រដ្ឋអំណាចកូរ៉េខាងត្បូង គឺកំពុងធ្វើសកម្មភាពឥតអៀនខ្មាស់ និងគួរឱ្យអាណិត ចំពោះការនិយាយយ៉ាងលឺៗអំពីការផ្សះផ្សារ និងកិច្ចសហប្រតិបត្តិការរវាងកូរ៉េខាងជើង និងកូរ៉េខាងត្បូង តែបែរជាទិញអាវុធពីអាមេរិក។

អ្នកស្រាវជ្រាវរូបនោះបានលើកឡើងយ៉ាងដូច្នេះថា៖ «គ្មានអ្វីដែលគួរឱ្យសង្ស័យសោះឡើយ ចំពោះការទិញយន្តហោះ F-35 ដែលមានគោលបំណងបង្កើនអំណាចយោធា ទៅលើប្រទេសជិតខាងក្នុងតំបន់ ជាពិសេសឈ្លានពានប្រទេសកូរ៉េខាងជើង ដែលជាប់របងជាមួយ។ យើងគ្មានជម្រើសណាផ្សេងក្រៅពីអភិវឌ្ឍ និងសាកល្បងអាវុធពិសេស ដើម្បីបំផ្លាញចោលទាំងស្រុងចំពោះយន្តហោះបំបាំងកាយនៅក្នុងប្រទេសកូរ៉េខាងត្បូង»

កាលពីខែមីនាកន្លងទៅ កូរ៉េខាងត្បូងបានទទួលយន្តហោះចម្បាំង F-35 ពីរគ្រឿងពីអាមេរិក ហើយសល់ប៉ុន្មានទៀតនឹងទទួលបាននៅឆ្នាំនេះ។ ជាមួយគ្នានោះ កូរ៉េខាងត្បូង បានយល់ព្រមទិញយន្តហោះដែលមានបច្ចេកវិទ្យាឈានមុខចំនួន ៤០គ្រឿង ដែលនឹងត្រូវបញ្ជូនទាំងអស់ត្រឹមឆ្នាំ២០២១៕

ប្រភព៖ Reuters ប្រែសម្រួល៖ សំភី