វៀតណាម គ្រោងរកវិធីសាស្រ្តបន្ថែមទៀត ដើម្បីរក្សាសពលោកហូជីមិញ ឱ្យកាន់តែយូរ
- 2019-07-19 03:22:50
- ចំនួនមតិ 0 | ចំនួនចែករំលែក 0
វៀតណាម គ្រោងរកវិធីសាស្រ្តបន្ថែមទៀត ដើម្បីរក្សាសពលោកហូជីមិញ ឱ្យកាន់តែយូរ
ចន្លោះមិនឃើញ
ក្រុមប្រឹក្សាវិទ្យាសាស្រ្តវេជ្ជសាស្រ្តរបស់វៀតណាម បានស្នើឱ្យរដ្ឋាភិបាលស្វែងរកដំណោះស្រាយបច្ចេកទេស និងវិទ្យាសាស្រ្ត ដើម្បីធានារក្សាសពលោកហូជីមិញ ឱ្យកាន់តែមានរយៈពេលយូរ។ នេះបើតាមការលើកឡើងរបស់លោកសាស្រ្តាចារ្យ Dang Vu Minh ដែលជាប្រធានក្រុមប្រឹក្សានេះ ក្នុងអំឡុងកិច្ចប្រជុំជាមួយនាយករដ្ឋមន្រ្តីវៀតណាម លោក ង្វៀន សួនហ៊្វុក នៅក្រុងហាណូយ កាលពីថ្ងៃទី១៨ ខែកក្កដា ឆ្នាំ២០១៩។
ចំណែកលោកសាស្រ្តាចារ្យ Banin Victor Vasilievich មកពីបណ្ឌិត្យសភាវិទ្យាសាស្រ្តរុស្ស៊ី បានថ្លែងថា ក្រុមប្រឹក្សានេះ បានយល់ព្រមបង្កើនកិច្ចសហប្រតិបត្តិការរវាងគណៈគ្រប់គ្រងចេតិយតម្កល់សពលោកហូជីមិញ និងមជ្ឈមណ្ឌលស្រាវជ្រាវជីវវេជ្ជសាស្រ្តក្រុងមូស្គូ។
លោកថា កិច្ចសហប្រតិបត្តិការនេះ នឹងជួយធ្វើឱ្យប្រសើរឡើងនូវការបណ្តុះបណ្តាលប្រកបដោយគុណភាពដល់បុគ្គលិកវេជ្ជសាស្រ្ត និងអ្នកបច្ចេកទេស ដែលពាក់ព័ន្ធនឹងការងាររក្សាសពនេះ។
ថ្លែងក្នុងកិច្ចប្រជុំនេះ លោក ង្វៀន សួនហ៊្វុក បានសម្តែងការអបអរសាទរដល់ក្រុមប្រឹក្សាខាងលើ និងអ្នកវិទ្យាសាស្រ្តរុស្ស៊ីសម្រាប់ការគាំទ្រ និងការសម្របសម្រួលរបស់ពួកគេ។ លោកនាយករដ្ឋមន្រ្តី បានអំពាវនាវឱ្យអ្នកវិទ្យាសាស្រ្តក្នុងស្រុក និងបរទេស ព្រមទាំងគណៈគ្រប់គ្រងចេតិយ ធ្វើការរួមគ្នាលើកការរក្សាសពនេះផងដែរ។
អតីតប្រធានាធិបតីវៀតណាម លោកហូជីមិញ បានទទួលមរណភាពនៅថ្ងៃទី២ ខែកញ្ញា ឆ្នាំ១៩៦៩។ សពរបស់លោក ត្រូវបានតម្កល់ក្នុងចេតិយហៅថា « Hồ Chí Minh Mausoleum» នៅទីលាន Ba Dinh Square។ ចេតិយនេះ ត្រូវបានសាងសង់ឡើងរយៈពេល ២ឆ្នាំ ពីឆ្នាំ ១៩៧៣ ដល់ ១៩៧៥។ ទីតាំងនេះបានទាក់ទាញភ្ញៀវចូលទស្សនារាប់ពាន់នាក់ក្នុងមួយឆ្នាំៗ៕