សពផ្សោតដែលងាប់កាលពីម្សិលមិញ ត្រូវបានដាក់ក្នុងទូរទឹកកក
- 2019-07-23 02:52:36
- ចំនួនមតិ 0 | ចំនួនចែករំលែក 0
សពផ្សោតដែលងាប់កាលពីម្សិលមិញ ត្រូវបានដាក់ក្នុងទូរទឹកកក
ចន្លោះមិនឃើញ
អង្គការមូលនិធិសកលសម្រាប់អភិរក្សធនធានធម្មជាតិ (WWF-កម្ពុជា) បានឱ្យដឹងថា សត្វផ្សោតដែលងាប់កាលពីថ្ងៃទី២២ ខែកក្កដាម្សិលមិញនេះ ត្រូវបានយកមករក្សាទុកនៅក្នុងទូរទឹកកកនៅឯការិយាល័យ WWF-ប្រចាំខេត្តក្រចេះ ដើម្បីទុកធ្វើកោសល្យវិច័យ។
សពផ្សោតដែលត្រូវបានគេប្រទះឃើញនៅក្នុងភូមិកាកុត ឃុំសំបុក ស្រុកចិត្របុរី ទីរួមខេត្តក្រចេះនេះ ត្រូវបានក្រុមការងារស្រាវជ្រាវរួម ដែលមានរដ្ឋបាលជលផល និងអង្គការ WWF សន្និដ្ឋានជាបឋមថា សត្វផ្សោតនោះ ស្លាប់ដោយសារជាប់ម៉ង ព្រោះមានស្នាមម៉ងនៅកន្ទុយរបស់វា។
ផ្សោតនោះជាផ្សោតឈ្មោល មានទម្ងន់ ១០៤ គីឡូក្រាម មានប្រវែងសរុប ១,៩៨ ម៉ែត្រ និងអាយុប្រហាក់ប្រហែលចន្លោះពី ១៥-១៨ឆ្នាំ។ នេះជាសត្វផ្សោតទី៥ហើយ ដែលត្រូវបានគេប្រទះឃើញងាប់តាំងពីខែមករា ឆ្នាំ២០១៩ រហូតមកដល់បច្ចុប្បន្ន ហើយចំនួនកូនផ្សោតដែលកើតក្នុងកំឡុងពេលដូចគ្នានេះគឺមានចំនួន ៩ក្បាល។
«ការដាក់ម៉ងនៅក្នុងតំបន់អភិរក្ស គឺជាកត្តាចំបងដែលធ្វើឱ្យមានការស្លាប់សត្វផ្សោតទន្លេមេគង្គ។ យើងខ្ញុំសូមអំពាវនាវ សូមកុំឱ្យមានការនេសាទខុសច្បាប់ក្នុងតំបន់អភិរក្ស ដើម្បីការពារសត្វផ្សោតទន្លេមេគង្គ ដែលជាបេតិកភណ្ឌមានជីវិតដ៏មានតម្លៃរបស់ប្រទេសយើង»។ នេះជាការលើកឡើងបន្ថែមរបស់អង្គការ WWF-កម្ពុជា៕
អត្ថបទ និងរូបថត៖ អង្គការ WWF-កម្ពុជា