សម្តេច​ក្រឡាហោម ស ខេង ឧប​នាយក​រដ្ឋមន្ត្រី រដ្ឋមន្ត្រី​ក្រសួង​មហាផ្ទៃ បាន​សម្រេច​ផ្អាកការងារ​លោក អ៉ឹង ឡាយឆាយ អធិការរង​នៃអធិការដ្ឋាន​នគរបាល​ស្រុក​ភ្នំស្រួច នៃស្នងការដ្ឋាន​នគរបាល​ខេត្ត​កំពង់ស្ពឺ ពាក់ព័ន្ធ​ករណី​បង្ខាំង​មនុស្ស​ដោយ​ខុសច្បាប់ គំរាម​កំហែង និង​ពាក់ព័ន្ធ​បទល្មើស​មួយ​ចំនួនទៀត។

យោងតាម​ប្រកាស​ចុះថ្ងៃទី១៩ ខែ​កក្កដា ឆ្នាំ​២០១៩ របស់​សម្តេច​ក្រឡាហោម ស ខេង បានប្រកាស​ស្ដីពីការ​ផ្អាក​ការងារ​បណ្ដោះ​អាសន្ន មន្ត្រី​នគរបាល​ជាតិ គឺ ផ្អាកការងារ​បណ្ដោះអាសន្ន​ចំពោះអនុសេនី​យ៍ឯក អ៉ឹង ឡាយឆាយ អត្តលេខ ៧៥៨២៦ អធិការ​រង​នៃអធិការដ្ឋាន​នគរបាល​ស្រុក​ភ្នំស្រួច ចំណុះ​ស្នងការ​ដ្ឋាន​នគរបាល​ខេត្ត​កំពង់ស្ពឺ។ មូលហេតុ៖ សាមីខ្លួន ត្រូវបាន​ប្រជាពលរដ្ឋ​ចោទប្រកាន់​ពីបទ: លួចមាន​ស្ថាន​ទម្ងន់ទោស រំលោភ​លើ​លំនៅដ្ឋាន​មានស្ថាន​ទម្ងន់ទោស​ចាប់​ឃុំឃាំង និង​បង្ខាំង​ដោយ​ខុសច្បាប់​មាន​ស្ថានទម្ងន់​ទោស និង​បទ​គំរាមកំហែង។

អនុសេនីយ៍ឯក អ៉ឹង ឡាយឆាយ ត្រូវមក​បង្ហាញខ្លួន​រៀងរាល់​ម៉ោងការងារ នៅការិយាល័យ​បុគ្គលិក នៃស្នងការដ្ឋាន​នគរបាល​ខេត្ត​កំពង់ស្ពឺ។

អគ្គលេខាធិការ នៃ​អគ្គលេខាធិការដ្ឋាន អគ្គស្នងការ​នៃអគ្គស្នងការដ្ឋាន​នគរបាល​ជាតិ អភិបាល​នៃ​គណៈ​អភិបាលខេត្ត​កំពង់ស្ពឺ ប្រធាន​នាយកដ្ឋាន​បុគ្គលិក ប្រធាន​នាយកដ្ឋាន អង្គភាព​ពាក់ព័ន្ធ ស្នងការ នៃ​ស្នងការដ្ឋាន​នគរបាល​ខេត្ត​កំពង់ស្ពឺ និងសាមីខ្លួន​ដែលមាន​ឈ្មោះ​ក្នុងប្រការ១ ត្រូវអនុវត្ត​តាមប្រកាស​នេះ ចាប់ពីថ្ងៃចុះ​ហត្ថលេខា​តទៅ៕