ឧបទ្ទវហេតុ​គ្រោះថ្នាក់​ចរាចរណ៍​ដោយ​​រថយន្តដឹក​កម្មករ​មួយគ្រឿង​ដែលបាន​ក្រឡាប់​នៅ​ខេត្ត​ស្វាយរៀង ​កាលពីព្រឹកថ្ងៃទី៣០ ខែកក្កដា ឆ្នាំ​២០១៩ បាន​បណ្តាល​ឱ្យ​កម្មកររងរបួស​ ៣១នាក់ និង​​ស្លាប់​២នាក់។ នេះ​បើតាមសេចក្តី​ប្រកាស​ព័ត៌មាន​របស់​ក្រសួងការងារ និង​បណ្តុះ​បណ្តាល​វិជ្ជាជីវៈ។

ហេតុការណ៍​នេះ កើតឡើង​ដោយសារតែ​រថយន្តនេះ​បើកបរជាន់ហ្វ្រាំង​ខ្លាំងពេក បណ្តាល​ឱ្យក្រឡាប់​ទៅម្ខាង​ថ្នល់ នា​វេលាម៉ោង ៧ និង ១០នាទីព្រឹក នៅ​ចំណុច​ភូមិ​កំពង់រទេះ ឃុំពពែត ស្រុកស្វាយទាប ខេត្ត​ស្វាយរៀង។

កម្មករ ១៥នាក់ ត្រូវបាន​បញ្ជូនទៅព្យាបាលនៅ​មន្ទីរពេទ្យបង្អែកជីភូ និង​១៦នាក់ទៀតនៅ​មន្ទីរពេទ្យ​បង្អែក​ខេត្ត​ស្វាយរៀង។ ចំណែក​កម្មករដែលបាន​ស្លាប់រួមមាន៖

១. ឈ្មោះ ស្រីពៅ អាយុ ២០ឆ្នាំ នៅភូមិបាក់ថង់ ឃុំគគីរសោម

២. ឈ្មោះ គង់ ចន្ធី ភេទប្រុស អាយុ៣២ឆ្នាំ នៅភូមិ​ទួលអង្គ ឃុំគគីរសោម៕