រថយន្ដ​ដឹកមាន់ មកពី​ប្រទេស​វៀតណាម បាន​បើកជ្រុល​ចង្កូត​ទៅបុក​រថយន្ដ​ដឹក​កម្មករ​កម្មការិនី​យ៉ាង​ពេញ​ទំហឹង ក្រឡាប់​ផ្ងារជើង​ទ្រមេឃ បណ្ដាល​ឲ្យ​មនុស្ស​ចំនួន ៤៣នាក់​រង​របួស​ធ្ងន់។ ហេតុការណ៍​នេះ កើតឡើង​កាលពីវេលា​ម៉ោង​ប្រហែល ៦ និង៣០នាទី​ព្រឹក ថ្ងៃទី​៣១ ខែ​កក្កដា ឆ្នាំ​២០១៩ នៅត្រង់​ចំណុច​ក្បែរស្ថានីយ​មួយកន្លែង ស្ថិតក្នុង​ភូមិ​កៀន​សាំង សង្កាត់​ស្វាយរៀង ក្រុង​ស្វាយរៀង។

មុនពេល​កើតមាន​នូវគ្រោះថ្នាក់​ចរាចរណ៍​នោះ គេឃើញ​រថយន្ដ​មួយគ្រឿង ចំណុះ​៥តោន ដឹកមាន់​រស់ មកពី​ប្រទេសវៀតណាម បើកបោះ​ពួយយ៉ាង​លឿន ក្នុងទិសដៅ​ពីកើត​ទៅលិច បញ្ច្រាស​ទិសគ្នា​ជាមួយនឹង​រថយន្ដ​ដឹកកម្មករ ម៉ាកសាំយ៉ុងមួយ​គ្រឿង ពណ៌លឿង ពាក់​ស្លាកលេខ កំពង់ស្ពឺ 2A-3239 ក្នុងទិសដៅ​ទៅកាន់​ក្រុងបាវិត។ លុះពេល​រថយន្ដដឹក​កម្មករ​កម្មការិនី បើកមក​ដល់ចំណុច​កើតហេតុ ស្រាប់តែ​រថយន្ដ​ដឹកមាន់​បានរេចង្កូត​ទៅបុក​រថយន្ដ​ដឹក​កម្មករ​យ៉ាង​ពេញ​ទំហឹង ធ្វើឱ្យរថយន្ត​ដឹកកម្មករ ក្រឡាប់​ផ្ងារជើង​ទ្រមេឃ បណ្ដាលឲ្យ​មនុស្សក្នុងរថយន្ត​ចំនួន ៣៥នាក់​រងរបួស (បុរស ៥នាក់)៕