លោក ស៊ុន ចាន់ថុល បើក​វគ្គ​បង្រៀន​បន្ថែម​ដល់​មន្ត្រី​ជួស​ជុល​ផ្លូវ​ថ្នល់

  • 2019-08-02 03:06:44
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្រសួង​សាធារណៈ​ការ និង​ដឹង​ជញ្ជូន បាន​បើក​វគ្គ​បណ្ដុះ​បណ្ដាល​បច្ចេកទេស​ជួស​ជុលផ្លូវថ្នល់​តាម​វិធីសាស្ត្រ Cold in Place Recycling ដោយមានការចូលរួមពីស្ថាប័នពាក់ព័ន្ធ និងមន្ត្រីបច្ចេកទេសនៃក្រសួងសាធារណការ និងដឹកជញ្ជូនផងដែរ។

លោក ស៊ុន ចាន់ថុល ក្នុងកម្មវិធីសិក្ខាសាលាស្ដីពីបច្ចេកទេសការជួសជុលផ្លូវថ្នល់

សិក្ខាសាលានេះ មានគោលបំណង បំពាក់បំប៉ននូវចំណេះដឹងថ្មី ចំណេះធ្វើ និងបទពិសោធន៍ថ្មីៗ បន្ថែម​លើ​ចំណេះ​ដឹង​ដែល​មាន​ស្រាប់​ជូន​ដល់​មន្ត្រី​ពាក់​ព័ន្ធ នៃក្រសួងសំដៅពង្រីក និងពង្រឹងសមត្ថភាពមន្ត្រីក្នុងការសាងសង់ និងជួសជុលថែទាំផ្លូវថ្នល់តាមវិធីសាស្រ្តថ្មី ស្រប​តាម​ការ​រីក​ចម្រើន​ផ្នែក​បច្ចេក​វិទ្យា​ក្នុង​ការ​សាង​សង់​ផ្លូវ​ឱ្យបានមាំ និងជាប់បានយូរ។

លោក ស៊ុន ចាន់ថុល បានបង្ហាញថា ការអភិវឌ្ឍសមត្ថភាពមន្ត្រីរាជការ គឺជាអាទិភាពទី១ ក្នុងវិស័យអាទិភាពទាំងបួននៃគោលនយោបាយចតុកោណដំណាក់កាលទី ៤ របស់រាជរដ្ឋាភិបាល ព្រោះថាមន្ត្រីមានសមត្ថភាពគ្រប់គ្រាន់ ស្ថាប័ននោះនឹងមានការរីកចម្រើន ហើយប្រទេសជាតិក៏មានការរីកចម្រើនតាមនោះដែរ ជា​ពិសេស សមត្ថភាព និងទេពកោសល្យ លើការសាងសង់ និងជួសជុលថែទាំផ្លូវថ្នល់ឱ្យមានគុណភាព មាំ និងជាប់បានយូរអង្វែង។

លោក​ក៏​បានសង្កត់ធ្ងន់ថា ក្រសួងមានគោលការណ៍ច្បាស់លាស់ក្នុងការសាងសង់ និងជួសជុលថែទាំផ្លូវថ្នល់ ពោលគឺទទួលយកតែផ្លូវណាដែលត្រូវបានសាងសង់ និងជួសជុល មានគុណភាព និងជាប់បានយូរប៉ុណ្ណោះ។

ក្រសួងនឹងរិះរកគ្រប់មធ្យោបាយ និងនីតិវិធីដើម្បីលើកកម្ពស់គុណភាពនៃការសាងសង់ និងជួសជុលផ្លូវ តាមរយៈការបណ្ដុះបណ្ដាល និងទស្សនកិច្ចសិក្សានៅតាមបណ្ដាប្រទេសជឿនលឿនមួយចំនួនលើសកលោក។

ក្នុង​កម្មវិធី​នេះ​ដែរ លោក ស៊ុន ចាន់ថុល ក៏បានផ្ដាំផ្ញើសិក្ខាកាមទាំងអស់ឱ្យយកចិត្តទុកដាក់ក្នុងការត្រងត្រាប់ស្តាប់ការធ្វើបទបង្ហាញរបស់វាគ្មិន និងចូលរួមជាមតិយោបល់ ក៏ដូចជាលើកជាសំណួរសួរដេញដោលឱ្យបានផុលផុស សំដៅក្រេបយកចំណេះដឹងថ្មីឱ្យបានច្រើនបំផុតតាមដែលអាចធ្វើបាន ព្រោះថាចំណេះដឹងទាំងនេះនឹងបម្រើដល់ការសាងសង់ និងជួសជុលផ្លូវថ្នល់យើងឱ្យបានមាំ និងប្រើប្រាស់បានយូរអង្វែង។ ធ្វើផ្លូវបានមាំ និងជាប់បានយូរអង្វែង គឺជាការសន្សំសំចៃការចំណាយថវិកាជាតិបានយ៉ាងច្រើនបំផុត៕

អត្ថបទ និងរូបភាព៖ ក្រសួងសាធារណការ និងដឹកជញ្ជូន

;