រឿងរ៉ាវគណៈកម្មការ X Factor ម្នាក់ ដែលបានសម្លាប់អាជីពខ្លួនពេលផ្សាយផ្ទាល់ (វីដេអូ)

2019-08-16 03:38:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្មវិធីប្រកួតប្រជែងដូចជា The Voice និង American Idol ជាដើមនោះ តែងមានឈុតឆាកល្បីៗជាច្រើនដក់ជាប់ក្នុងដួងចិត្តអ្នកទស្សនា។ ប៉ុន្តែវាមិនអាចយកឈ្នះវគ្គមួយនៃកម្មវិធី X Factor ប្រទេសនូវែលហ្សេឡង់ ពេលដែលគណៈកម្មការម្នាក់បានសម្លាប់អាជីពរបស់ខ្លួន ខណៈពេលកំពុងផ្សាយផ្ទាល់ ហើយបានអូសស្វាមីឲ្យដុនដាបជាមួយផងដែរ។

Kills និងស្វាមី

គណៈកម្មការរូបនេះ ត្រូវដឹងថាមានឈ្មោះ Natalia Kills ជាអ្នកចម្រៀង និងអ្នកនិពន្ធចម្រៀង ប៉ុន្តែក្រោយកើតហេតុនាងបានប្ដូរឈ្មោះជា Teddy Sinclair វិញ។ Kills គឺជាតារាជោគជ័យម្នាក់ក្នុងវិស័យសិល្បៈ ដែលធ្លាប់មានបទចម្រៀងជាប់ចំណាត់ថ្នាក់លេខ ១ កាលពីឆ្នាំ ២០០៨ និងធ្លាប់បានចេញអាល់ប៊ុមចម្រៀងចំនួនពីរ។

នៅឆ្នាំ ២០១៤ នាងបានរៀបការជាមួយតារាចម្រៀងសញ្ជាតិនូវែលហ្សេឡង់ឈ្មោះ Willy Moon ដែលរូបគេត្រូវបានមហាជនស្គាល់កាលពីឆ្នាំ ២០១២ នៅពេលដែលបទចម្រៀង "Yeah Yeah” របស់ខ្លួន ត្រូវបាន Apple យកប្រើក្នុងវីដេអូពាណិជ្ជកម្មរបស់ iPod។

ឆាកជីវិតរបស់គូស្នេហ៍មួយគូនេះ ដើរទៅមុខយ៉ាងរលូន រហូតបានក្លាយជាគណៈកម្មការកម្មវិធី X Factor ទាំងពីរនាក់។ ប៉ុន្តែរឿងល្អៗត្រូវបានបញ្ចប់នៅថ្ងៃទី ១៥ ខែមីនា ឆ្នាំ ២០១៥ ពេលដែល Kills បានជួបនឹងបេក្ខជនឈ្មោះ Joe Irvine។

Joe Irvine

នៅពេលទស្សនាការសម្ដែងរបស់បេក្ខជនខាងលើរួច Kills បានបង្ហាញអារម្មណ៍របស់ខ្លួន ដោយយល់ថា Irvine មានចេតនាចម្លងតាមស្ទីលស្វាមីរបស់ខ្លួន ចាប់តាំងពីការច្រៀង រហូតដល់ការតុបតែងខ្លួន។

ពេលនោះ Kills បាននិយាយដូចនេះ ៖ "លោកលោកស្រី អ្នកនាងកញ្ញា ខ្ញុំនឹងនិយាយអំពីចំណុចដែលខ្ញុំឃើញផ្ទាល់ភ្នែក គឺយើងកំពុងតែមានមនុស្សក្លែងបន្លំម្នាក់”។ នាងបានបន្តទៀតថា ៖ "ខ្ញុំពិតជាខ្ពើមរអើមខ្លាំងណាស់ លើការខំធ្វើតាមប្ដីរបស់ខ្ញុំ។ ចាប់តាំងពីសក់ ដល់សំលៀកបំពាក់។ អ្នកសមនឹងត្រូវគេសើចចំអក។ ពិតជាថោក។ ពិតជាគួរឲ្យខ្ពើម”។

ទោះបីមហាជនបានចាប់ផ្ដើមបង្ហាញប្រតិកម្មមិនយល់ស្រប ប៉ុន្តែគណៈកម្មការរូបនេះនៅបន្តនិយាយថា ៖ "ខ្ញុំផ្ទាល់ គិតថាវាអន់ខ្លាំងណាស់។ ពិតជាគួរឲ្យអាម៉ាស់មែន”។

ចំណែក Moon ដែលជាស្វាមីរបស់ Kills បានបន្ថែមពាក្យសម្ដីថា ៖ "ខ្ញុំមានអារម្មណ៍ថា អ្នកដូចចង់ដេរស្បែករបស់អ្នកដទៃ ដាក់លើមុខរបស់អ្នក ហើយសម្លាប់គ្រប់គ្នាដែលកំពុងទស្សនា”។

ក្រោយរឿងហេតុនេះ Kills និង Moon ត្រូវគេបញ្ឈប់ពីកម្មវិធីភ្លាម ក្នុងរយៈពេល ២៤ ម៉ោង ដោយក្រុមហ៊ុនផលិតកម្មវិធីនេះបានបង្ហោះសារនិយាយថា ៖ "យើងបានសម្រេចថា Natalia Kills និង Willy Moon លែងសក្ដិសមជាគណៈកម្មការ X Factor NZ និងបានដកចេញពីកម្មវិធីហើយ”។