មកស្គាល់ វីរបុរសសង្គ្រោះជីវិតជាង ២០០នាក់ ពេលយន្ដហោះមានបញ្ហាចុះចតក្នុងចម្ការពោត

2019-08-20 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យន្ដហោះដឹកអ្នកដំណើរមួយគ្រឿងប្រភេទ Airbus A321 របស់ក្រុមហ៊ុនអាកាសចរ Ural Airlines បានធ្វើការចុះចតបន្ទាន់នៅក្នុងចម្ការពោតមួយជិតទីក្រុង ម៉ូស្គូប្រទេសរុស្ស៊ីក្រោយហោះបុកហ្វូងបក្សីកាលពីថ្ងៃទី ១៥ខែសីហាកន្លងទៅ។

ផ្ទុកអ្នកដំណើរ ២៦៦នាក់ យន្ដហោះជួបហេតុការណ៍ខាងលើ បានធ្វើដំណើរចេញពីព្រលានយន្ដហោះអន្ដរជាតិ Zhukovsky ទៅកាន់ទីក្រុង Simferopo។ យោងតាមសារព័ត៌មានក្នុងតំបន់ឲ្យដឹងថា ក្រោយហោះហើរចេញបានប៉ុន្មាននាទីប៉ុណ្ណោះ យន្ដហោះបានធ្វើការចុះចតបន្ទាន់នៅក្នុងចម្ការពោតដែលស្ថិតនៅចម្ងាយប្រមាណមួយគីឡូម៉ែត្រពីព្រលាន ហើយបណ្ដាលឲ្យមនុស្សជាង ២៣នាក់ដោយក្នុងនោះមានក្មេងៗ ៥នាក់ត្រូវបានបញ្ជូនទៅកាន់មន្ទីពេទ្យ ខណៈដែលមិនមាននរណាម្នាក់បាត់បង់ជីវិតនោះទេ។

ស្ថិតនៅពីក្រោយការជួយសង្គ្រោះជីវិតមនុស្សដ៏អស្ចារ្យក្នុងហេតុការណ៍ដ៏រន្ធត់នេះ គឺជាអ្នកបើកបរយន្ដហោះឈ្មោះ Damier Yusupov និងជំនួយការលោក Georgy Murzin។ ជាមួយនឹងបទពិសោធន៍បើកបរត្រឹមជាង ៣ពាន់ម៉ោង អ្នកបើកបរយន្ដហោះវ័យ៤១ឆ្នាំឲ្យដឹងថា តាមពិតទៅនៅពេលកើតហេតុ លោកចង់បកត្រឡប់ទៅកាន់ព្រលានវិញដែរ ប៉ុន្តែដោយសារម៉ាស៊ីនទាំងពីររបស់យន្ដហោះមិនដំណើរការក្រោយសត្វបក្សីហោះចូល លោកក៏សម្រេចចិត្តចុះចតក្នុងចម្ការពោតដោយគ្មានផ្លូវរត់តែម្ដង ខណៈដែលនៅជុំវិញនោះជាទីធ្លាស្រឡះមិនមានផ្ទះសម្បែង និងអគារ។ បើទោះបីជាប្រឈមមុខនឹងគ្រោះថ្នាក់ខ្លាំងយ៉ាងណាក៏ដោយ លោក Yusupov បានព្យាយាមចុះចតក្នុងចម្ការពោតតាមសម្រួលដោយបន្ទាបខ្លួនយន្ដហោះបន្ដិចម្ដងៗតាមដែរអាចទៅរួច។ បុរសរូបនេះបន្ថែមថា "ខ្ញុំមិនមានអារម្មណ៍ថាខ្លួនឯងជាវីរបុរសនោះទេ ដោយសារតែខ្ញុំធ្វើអ្វីដែលត្រូវតែធ្វើដើម្បីជួយសង្គ្រោះយន្ដហោះ និងអ្នកដំណើរក្នុងនោះប៉ុណ្ណោះ។”

(អ្នកបើកបរយន្ដហោះឈ្មោះ Damier Yusupov)

ជាមួយគ្នាដែរ បុគ្គលិកក្នុងយន្ដហោះដែលរួមការងារជាមួយគ្នាឲ្យដឹងថា នៅពេលកើតហេតុលោក Yusupov បានព្យាយាមសម្រួលអារម្មណ៍ និងរក្សាវីជ្ជាជីវៈរបស់ខ្លួន ដែលជាគុណសម្បត្តិធ្វើឲ្យការចុះចតទទួលជោគជ័យពេលមានអាសន្ន៕