លោក ស៊ុន ចាន់ថុល ក្រើនរំលឹកពាក្យប៉ុន្មានម៉ាត់ដល់និស្សិត ហុង ភារិន ដែលមានសមត្ថភាពចងចាំល្អ

2019-09-03 12:18:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានក្រើនរំលឹកដល់និស្សិត ហុង ភារិន ថា «ទោះបីជាស្ថិតនៅក្នុងកាលៈទេសៈណាក៏ដោយ ត្រូវយកចំណេះជំនាញដែលខ្លួនមានមកបម្រើប្រទេសជាតិវិញ»។ ការផ្តល់ដំបូន្មាននេះ ធ្វើឡើងក្នុងពេលដែលលោក ស៊ុន ចាន់ថុល បានទទួលជួបសំណេះសំណាលជាមួយនិស្សិត ហុង ភារិន ដែលជានិស្សិតទទួលបានអាហារូបករណ៍ទៅសិក្សានៅប្រទេសថៃ និងមានសម្ថភាពពិសេសផ្នែកចងចាំបានល្អ នាថ្ងៃទី៣ ខែកញ្ញា ឆ្នាំ២០១៩។

ក្នុងជំនួបនេះ លោកទេសរដ្ឋមន្រ្តី បានកោតសរសើរចំពោះទេពកោសល្យរបស់ ភារិន ដែលមានសមត្ថភាពពិសេសអាចចងចាំបានល្អ។ ឆ្លៀតក្នុងឱកាសនោះផងដែរ លោក ស៊ុន ចាន់ថុល បានក្រើនរំលឹកឲ្យភារិន ខិតខំប្រឹងប្រែងបង្កើនសមត្ថភាពខ្លួនបន្តទៅមុខទៀតដោយមិនត្រូវភ្លេចខ្លួនឡើយ។ បន្ថែមពីលើនេះ លោកបានលើកឡើងអំពីបទពិសោធន៍ផ្ទាល់ខ្លួនទាំងការសិក្សារៀនសូត្រ និងការបំពេញការងារក្នុងវិស័យឯកជន និងវិស័យសាធារណៈ និងបានជំរុញលើកទឹកចិត្ត ឱ្យភារិនមានស្មារតីស្រឡាញ់សង្គមជាតិ ទោះបីស្ថិតនៅក្នុងកាលៈទេសៈណាក៏ដោយ ខ្លួនជាកូនខ្មែរ មានបេះដូងជាខ្មែរ ត្រូវយកចំណេះជំនាញដែលខ្លួនមានមកបម្រើប្រទេសជាតិវិញផងដែរ។

លោកទេសរដ្ឋមន្រ្តី បានផ្តល់ជូននូវឃ្លាទូន្មានជាភាសាអង់គ្លេសថា “I Must Study Harder” ប្រែថា “ខ្ញុំដាច់ខាតត្រូវតែខិតខំប្រឹងប្រែងរៀនសូត្រឲ្យកាន់តែខ្លាំងឡើង” ដល់ភារិន ដើម្បីជំរុញលើកទឹកចិត្តឱ្យភារិនកាន់តែខិតខំប្រឹងប្រែងបន្ថែមទៀត។

ជាការឆ្លើយតប ហុង ភារិន បានថ្លែងអំណរគុណយ៉ាងជ្រាលជ្រៅ ចំពោះលោកទេសរដ្ឋមន្ត្រី ដែលតែងតែជួយគាំទ្រ និងលើកទឹកចិត្ត ដល់និស្សិតឆ្នើមរបស់កម្ពុជានាពេលកន្លងមក រួមទាំងខ្លួនលោកផ្ទាល់ផងដែរ។ លោកប្តេជ្ញាថា នឹងខិតខំប្រឹងរៀនសូត្របន្ថែមទៀតតាមអនុសាសន៍ណែនាំ ដើម្បីចែករំលែកចំណេះដឹងរបស់លោកដល់សិស្សនិស្សិតកម្ពុជា ក៏ដូចជាសម្រេចក្តីសុបិន្តរបស់លោកក្នុងការរួមចំណែកកសាងប្រទេសកម្ពុជា ឱ្យកាន់តែរីកចម្រើនថែមទៀត៕

ចុចអាន៖ និស្សិត ហុង ភារិន ចង់លើកទង់ជាតិខ្មែរ ក្នុងការប្រកួតសមត្ថភាពនៃការចងចាំលំដាប់ពិភពលោក

អត្ថបទ និងរូបថត៖ ក្រសួងសាធារណការ និងដឹកជញ្ជូន