លោកត្រាំសន្យាថានឹងវាយលុកពួក តាលីបង់ «កាន់តែខ្លាំង»

2019-09-13 06:39:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីសហរដ្ឋអាមេរិក លោក ដូណាល់ ត្រាំ បានសន្យាវាយលុកពួក តាលីបង់ កាន់តែខ្លាំងជាងអ្វីដែលពួកគេធ្លាប់ទទួលរងពីមុនមក។ លោក ត្រាំ បាននិយាយបែបនេះខណៈសហរដ្ឋអាមេរិកប្រារព្ធខួបទី១៨ នៃការវាយប្រហារអគារភ្លោះ ១១ កញ្ញា ឆ្នាំ២០០១។

ការអធិប្បាយរបស់លោកត្រាំកើតឡើងប៉ុន្មានថ្ងៃក្រោយលោកលុបចោលផែនការអញ្ជើញមេដឹកនាំរបស់ ក្រុមឧទ្ទាម តាលីបង់ មកចរចាលើកទឹកដីអាមេរិក ដោយបានប្រកាសថាកិច្ចចរចានោះគឺ «ងាប់» បាត់ហើយ។ កាលពីអាទិត្យមុនទាហានរបស់អាមេរិកម្នាក់បាត់បង់ជីវិតដោយសារការបំផ្ទុះគ្រាប់បែកអត្តឃាតដោយក្រុមឧទ្ទាមនេះ នៅទីក្រុងកាប៊ូល ប្រទេសអាហ្វហ្គានីស្ថាន។

មុនលោកត្រាំលុបចោលកិច្ចចរចានេះ ភាគីទាំងពីរឈានជិតដល់ការចុះកិច្ចព្រមព្រៀងបញ្ចប់សង្គ្រាមនៅអាហ្វហ្គានីស្ថាន។ ក្នុងកិច្ចព្រមព្រៀងនេះ អាមេរិកយល់ព្រមដកទ័ពចេញពីអាហ្វហ្គានីស្ថាន ហើយភាគី តាលីបង់យល់ព្រមឈប់ប្រើប្រទេសអាហ្វហ្គានីស្ថានជាមូលដ្ឋានសម្រាប់ប្រព្រឹត្តិអំពើភេរវកម្មជុំវិញពិភពលោក។

អ្នកនាំពាក្យក្រុម តាលីបង់ លោក Zabihullah Mujahid បានបញ្ជាក់ថាលោក ត្រាំ នឹងស្ដាយក្រោយ ដោយលោកបាននិយាយថា៖ «យើងមានមធ្យោបាយពីរដើម្បីបញ្ចប់ការកាន់កាប់ប្រទេសអាហ្វហ្គានីស្ថាន មួយគឺជីហាដនិងការប្រយុទ្ធគ្នា មួយទៀតគឺការពិភាក្សានិងចរចា។ បើលោកត្រាំចង់ឈប់និយាយគ្នា យើងត្រូវជ្រើសរើសយកមធ្យោបាយទីមួយ ហើយពួកគេនឹងស្ដាយក្រោយ»៕

ប្រភព៖ Aljazeera ប្រែសម្រួល៖ សុខ វេងឈាង