ប្រទេសអាស៊ាន១ ក្លាយជាប្រទេសនាំចេញកៅស៊ូធំដាច់គេលើពិភពលោក

2019-09-17 04:33:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថៃបានជាប់ឈ្មោះជាប្រទេសដែលលក់ចេញកៅស៊ូច្រើនជាងគេបង្អស់នៅលើពិភពលោក ខណៈដែលចិនឈរនៅលេខរៀងទី១ ជាអ្នកក្ដោបយកចំណែកទីផ្សារនាំចូលកៅស៊ូច្រើនជាងគេពីថៃ។ នេះបើយោងតាមការប្រកាសរបស់ក្រសួងពាណិជ្ជកម្មថៃ កាលពីថ្ងៃទី១៥ ខែកញ្ញា ឆ្នាំ២០១៩។

ប្រភពដដែល បានបញ្ជាក់ថា ដោយសារតែកិច្ចព្រមព្រៀងពាណិជ្ជកម្មសេរីចំនួន ១៣ ជាមួយបណ្ដាប្រទេសចំនួន១៨ ថៃអាចរកចំណូលពីការនាំចេញកៅស៊ូបានចំនួនជាង ៤,៦ពាន់លានដុល្លារ កាលពីឆ្នាំ២០១៨។ តួលេខនេះស្មើនឹង ១,៨២% នៃចំណូលនាំចេញសរុបរបស់ប្រទេសថៃ។

កម្មករចម្ការកៅស៊ូថៃ កំពុងប្រមូលផលជ័រកៅស៊ូ (រូបភាព៖ poandpo)

លោកស្រី Auramon Sapthaweetham ប្រធានអគ្គនាយកដ្ឋានកិច្ចចរចាពាណិជ្ជកម្ម នៃក្រសួងពាណិជ្ជកម្មថៃ បាននិយាយថា៖ "ចិនជាទីផ្សារនាំចេញធំបំផុតរបស់ថៃ ដោយទទួលទិញកៅស៊ូពីថៃចំនួន ១,៩៦ពាន់លានដុល្លារ។ វាស្មើនឹង ៤៣% នៃការនាំកៅស៊ូសរុបរបស់ថៃ ក្នុងឆ្នាំ២០១៨"។

លោកស្រី Auramon បានបន្តទៀតថា ថៃក៏បាននាំចេញកៅស៊ូទៅបណ្ដាប្រទេសផ្សេងទៀតផងដែរនៅក្នុងអាស៊ីអាគ្នេយ៍ ក៏ដូចនៅសហរដ្ឋអាមេរិក ជប៉ុន និងកូរ៉េខាងត្បូង ជាដើម៕

ប្រភព៖ Xinhua ប្រែសម្រួល៖ ឈាង