រដ្ឋាភិបាល​ឥណ្ឌូណេស៊ី បាន​ប្រកាស​រើរដ្ឋធានី​ពី ហ្សាកាតា ទៅ​កាន់​តំបន់​កោះ​កាលី​ម៉ាន់តាន់​ខាងកើត បាន​ធ្វើឱ្យដី​នៅ​តំបន់​នេះ កំពុង​ឡើងថ្លៃ។ នេះបើតាមការចុះផ្សាយរបស់ Channel News Asiaនៅថ្ងៃទី១៨ ខែកញ្ញា ឆ្នាំ​២០១៩។

​រដ្ឋធានី​ថ្មីនេះ គ្រោងនឹង​ចាប់ផ្តើម​សាងសង់​​នៅឆ្នាំ២០២០ លើ​ដីទំហំ ៤ម៉ឺន​ហិកតា ហើយ​រដ្ឋាភិបាល​នឹងរើ​រដ្ឋបាល​របស់ខ្លួនទាំងអស់ ទៅ​កាន់រដ្ឋធានីថ្មី​នៅត្រឹមឆ្នាំ​២០២៤។

តាម​បណ្តោយ​ផ្លូវមួយចំនួន​ក្នុងតំបន់​រដ្ឋធានី​ថ្មី បាន​ដាក់ផ្លាក​លក់ដី គួរឱ្យកត់សម្គាល់។ បុរស​ម្នាក់​ដែលកំពុងដាក់ផ្លាកសញ្ញានេះ បាន​សារព័ត៌មានខាងលើថា គាត់លក់ដីក្នុង១ហិកតាតម្លៃ ១,២ពាន់លានរូព្យ៉ា (ជាង ៨,៥ម៉ឺន​ដុល្លារអាមេរិក)។ គាត់​ថា អ្នករាល់គ្នា​កំពុង​ដំឡើង​ថ្លៃដី​របស់ពួកគេ ពោលគឺពីមុន ដី១ហិកតា តម្លៃតែ ១២៥លានរូព្យ៉ា (ជាង ៨,៩ពាន់ដុល្លារ​អាមេរិក) តែប៉ុណ្ណោះ។

បើតាម​លោក Eko ម្ចាស់ភោជនីយដ្ឋាន​មួយកន្លែង​ក្នុង​តំបន់នោះ បាន​អះអាងថា រៀងរាល់ថ្ងៃ ភ្ញៀវ​ក្នុងហាង​របស់លោក បាន​ជជែកគ្នាច្រើន​ពីតម្លៃដី និង​ស្វែងរកទិញដី។ ក្នុងចំណោម​នោះភាគច្រើន​គឺជាអ្នកគួកជេដី។

លោក​ថា តម្លៃដី​បានឡើងជាគំហុក បន្ទាប់ពីប្រធានាធិបតី លោក ចូកូ វីដូដូ បាន​ប្រកាស​រើរដ្ឋធានី។ «ពីមុនដី ៤ហិកតា លក់បានត្រឹម ៣៥០លានរូព្យ៉ា (ជាង ២,៤ម៉ឺនដុល្លារអាមេរិក) ប៉ុណ្ណោះ ប៉ុន្តែឥឡូវ​វាមានតម្លៃរហូតដល់ ៤ពាន់លានរូព្យ៉ា (ជាង ២៨ម៉ឺនដុល្លារអាមេរិក)»៕