ចិន បើកសម្ពោធព្រលានយន្តហោះថ្មីមួយ ដែលនឹងអាចក្លាយជាព្រលានធំបំផុតក្នុងលោក
- 2019-09-25 08:46:32
- ចំនួនមតិ 0 | ចំនួនចែករំលែក 0
ចិន បើកសម្ពោធព្រលានយន្តហោះថ្មីមួយ ដែលនឹងអាចក្លាយជាព្រលានធំបំផុតក្នុងលោក
ចន្លោះមិនឃើញ
ព្រលានយន្តហោះអន្តរជាតិ Daxing នៅក្រុងប៉េកាំង ប្រទេសចិន ត្រូវបានបើកសម្ពោធជាផ្លូវការនៅថ្ងៃទី២៥ ខែកញ្ញា ឆ្នាំ២០១៩ ក្រោមអធិបតីភាពរបស់លោកប្រធានាធិបតី ស៊ី ជិនពីង។ ការបើកសម្ពោធនេះ ធ្វើឡើងប៉ុន្មានថ្ងៃប៉ុណ្ណោះ មុនប្រារព្ធខួប ៧០ឆ្នាំនៃការបង្កើតសាធារណរដ្ឋប្រជាមានិតចិន។
ព្រលានយន្តហោះដែលមានរាងដូចផ្កាយសមុទ្រនេះ ស្ថិតនៅប៉ែកខាងត្បូងនៃក្រុងប៉េកាំង ដែលវានឹងជួយសម្រាលចំនួនអ្នកដំណើរនៅព្រលានយន្តហោះប៉េកាំងបច្ចុប្បន្ន។ ព្រលានថ្មីនេះ មានចម្ងាយប្រមាណ ៤៦គីឡូម៉ែត្រ ពីទីលានធានអានមីន។
ព្រលានយន្តហោះនេះ នឹងប្រតិបត្តិការពេញលេញនៅឆ្នាំ២០២៥ ជាមួយផ្លូវរត់យន្តហោះចំនួន៤ ដែលមានសក្តានុពលអាចទទួលអ្នកដំណើរបាន ៧២លាននាក់។ ត្រឹមឆ្នាំ២០៤០ វានឹងត្រូវពង្រីកផ្លូវរត់ដល់ចំនួន៨ ក្នុងនោះមានផ្លូវ១សម្រាប់យន្តហោះយោធា ហើយអាចស្វាគមន៍ភ្ញៀវប្រមាណ ១០០លាននាក់ក្នុងឆ្នាំ ដែលនឹងអាចធ្វើឱ្យវាក្លាយជាព្រលានយន្តហោះធំជាងគេក្នុងពិភពលោក (Single Terminal)។
បច្ចុប្បន្ន ព្រលានយន្តហោះ Atlanta នៅសហរដ្ឋអាមេរិក ដែលជាព្រលានមមាញឹកជាងគេក្នុងលោក ក៏ទទួលបានអ្នកដំណើរប្រមាណ ១០០លាននាក់ផងដែរ ប៉ុន្តែឆ្លងកាត់ Terminal ចំនួន២។
ប្រទេសចិន ត្រូវបានរំពឹងថា នឹងមានជើងហោះហើរសរុប ១,៦ពាន់លាន ក្នុងមួយឆ្នាំ ចាប់ពីឆ្នាំ២០៣៧ ខណៈកាលពីឆ្នាំ២០១៧ មានជើងហោះហើរជាង ១ពាន់លានរួចមកហើយ។
សម្រាប់ក្រុងប៉េកាំង ដែលមានប្រជាជន ២១លាននាក់ ត្រូវបានរំពឹងថា នឹងទទួលស្វាគមន៍អ្នកដំណើរតាមព្រលានយន្តហោះទាំង២ខាងលើ ចំនួន១៧០លាននាក់ នៅក្នុងឆ្នាំ២០២៥៕