ចំណុចបីសំខាន់គួរដឹងចំពោះអ្នកចង់ទិញខុនដូ បើមិនចង់ទឹកភ្នែកពេលក្រោយ

2019-10-04 06:51:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកអភិវឌ្ឍវិស័យអចលនទ្រព្យលើកឡើងថាអ្នកចង់ទិញខុនដូត្រូវពិចារណាលើចំណុចបីសំខាន់គឺទីតាំង ដឹងពីអ្នកឬម្ចាស់អភិវឌ្ឍន៍ និងដឹងថាតើម្ចាស់នោះមានថវិកាអភិវឌ្ឍគ្រប់គ្រាន់ឬយ៉ាងណា។

អគ្គនាយកក្រុមហ៊ុនWorld Bridge Group លោក សៀ រិទ្ធី ថ្លែងក្នុងពិធីតាំងពិព័រណ៍អចលនទ្រព្យនាព្រឹកនេះថាអ្នកចង់ទិញខុនត្រូវចេះជ្រើសរៀសទីតាំងជារឿងសំខាន់។ លោកលើកឡើងថានៅប្រទេសមួយចំំនួនអ្នកទិញខុនដូចង់បានទីតាំងនៅជិតស្ថានីយរថភ្លើង ឬផ្លូវធំៗ ដោយថាដើម្បីងាយស្រួកក្នុងការធ្វើដំណើរ។ ចំណែកនៅកម្ពុជាវិញលោកថាអ្នកទិញត្រូវស្វែងយល់ខ្លួនឯងថាតើកន្លែងណាអាចអភិវឌ្ឍន៍លឿន។

លោកពន្យល់ថាការទិញខុនដូនៅក្នុងទីក្រុងធ្វើឲ្យមនុស្សចំណេញពេលវេលាក្នុងការធ្វើដំណើរមកធ្វើការ។ លោកលើកជាឧទាហរណ៍ថាកាលពី៣០ឆ្នាំមុនប្រជាជនថៃមិនសូវមានអ្នកទិញខុនដូនោះទេគឺមានតែបរទេសអ្នកទិញ ប៉ុន្តែលោកថាបច្ចុប្បន្នអ្នកទិញខុនដូភាគច្រើនជាជនជាតិថៃ។ នៅថ្ងៃខាងមុខលោកថាប្រជាជនកម្ពុនជានឹងដូចគ្នានេះដែរ ដោយថាមិនចង់ធ្វើដំណើរច្រើនម៉ោងមកកន្លែងធ្វើការ។

ចំណុចមួយទៀតលោកថាអ្នកទិញខុនដូត្រូវដឹងថាម្ចាស់គម្រោងខុនដូជាអ្នកណា ជាអ្នកអភិវឌ្ឍពិតប្រាដក ឬគ្រាន់តែជាអ្នកមានលុយហើយចង់អភិវឌ្ឍ។ លោកបញ្ជាក់ថាមុនឆ្នាំ២០០៨អ្នកមានធនធានកូរ៉េខាងត្បូងបានមកបោះទុនរកស៊ីខាងវិស័យខុនដូនៅកម្ពុជា ប៉ុន្តែថាគម្រោងទាំងនោះត្រូវជាប់គាំង។ លោកថាការសង់ខុនដូខុសពីការសង់ផ្ទះដែលមានរឿងច្រើននៅពីក្រោយត្រូវស្វែងយល់។

លោកបន្ថែមថា៖ «ជនជាតិកូរ៉េមកអភិវឌ្ឍក្នុងសម័យនោះពូកគាត់មិនមែនជាអ្នកDevelopers ទេពួកកាត់ភាគច្រើនជាអ្នកមាន គាត់ឃើញឱកាស ឃើញដីថោកក៏ទិញមកសង់ ប៉ុន្តែការសង់ខុនដូរមិនមែនដូចការសង់ផ្ទះមួយទេ វាមានរឿងច្រើនណាស់នៅពីក្រោយដែលត្រូវស្វែងយល់ ពេលគាត់ជួបបញ្ហា គួបផ្សំនឹងគាត់ជួបវិបត្តិហិរញ្ញវត្ថុនៅកូរ៉េ វាគាំងទាំងអស់ យើងឃើញហើយគម្រោងជំនាន់នោះគាំងទាំងអស់»។

សម្រាប់ចំណុចចុងក្រោយលោកថាអ្នកចង់ទិញខុនដូត្រូវដឹងថាអ្នកអភិវឌ្ឍន៍នោះមានប្រាក់គ្រប់គ្រាន់ក្នុងការសាងសង់ឬយ៉ាងណា។ ដើម្បីដឹងពីចំណុចនេះលោកថាអ្នកចង់ទិញខុនដូត្រូវតាមដានមើលថាតើអ្នកអភិវឌ្ឍន៍រូបនោះធ្លាប់បានសង់ខុនដូនៅទីណាខ្លះ ហើយបានជោគជ័យយ៉ាងម៉េចខ្លះ។

លោកបន្ថែមថា៖ «យើងត្រូវ Keep record របស់គាត់ធ្លាប់ធ្វើនៅណាខ្លះ ជោគជ័យឬអត់ មានគុណភាពឬអត់ យើងត្រូវសិក្សាទាំងអស់ កុំនាំគ្នាទៅទិញខុនដូទាំងបិទភ្នែក ព្រោះតែទិញហើយគឺទិញហើយ អ៊ីចឹងចំណុចទាំងបីនេះដែលបងប្អូនត្រូវពិចារណា»។

គួរបញ្ជាក់ថាការតាំងពិព័រណ៍អចលនទ្រព្យធ្វើឡើងចំនួនពីរថ្ងៃពីថ្ងៃទី៤ ដល់ទី៥ ខែតុលា ឆ្នាំ២០១៩ នៅណាហ្គាវើលទី១ ដែលមានក្រុមហ៊ុនជាង៨០ចូលរូមតាំងពិព័រណ៍គម្រោងរបស់ខ្លួន៕

អត្ថបទ៖ ទូច សុខា