គិតត្រឹម ៨ខែដើមឆ្នាំ២០១៩ ទុនវិនិយោគនៅកម្ពុជាមានជាង ៦ពាន់លានដុល្លារ
- 2019-10-11 03:29:17
- ចំនួនមតិ 0 | ចំនួនចែករំលែក 0
គិតត្រឹម ៨ខែដើមឆ្នាំ២០១៩ ទុនវិនិយោគនៅកម្ពុជាមានជាង ៦ពាន់លានដុល្លារ
ចន្លោះមិនឃើញ
ក្នុងរយៈពេល ៨ខែ ដើមឆ្នាំ២០១៩ គម្រោងវិនិយោគនៅកម្ពុជាមានចំនួន ២២២គម្រោង ដែលមានទុនវិនិយោគប្រមាណ ៦ពាន់លានដុល្លារ ពោលគឺមានការកើនឡើងចំនួន ៨១គម្រោង និងមានទុនវិនិយោគប្រមាណ ១៨០០លានដុល្លារ បើប្រៀបធៀបរយៈពេលដូចគ្នានៅឆ្នាំ២០១៨។ ហើយនៅ ក្នុងតំបន់សេដ្ឋកិច្ចពិសេសគម្រោងវិនិយោគមានចំនួន ៧១គម្រោង ដែលមានទុនវិនិយោគ ៥៧៨លានដុល្លារ ពោលគឺមានការកើនឡើងចំនួន២៦គម្រោង និងទុនវិនិយោគកើន ១៩លានដុល្លារ។ ការលើកឡើងនេះ នៅក្នុងសន្និសីទព័ត៌មានស្ដីពីសក្តានុពលនៃការវិនិយោគនៅកម្ពុជា ដោយលោក ជា វុទ្ធី អគ្គលេខាធិការងក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១០ តុលា នៅទីស្តីការគណរដ្ឋមន្ត្រី។
ទន្ទឹមនឹងកំណើនសកម្មភាពវិនិយោគជារួមដែលមានការកើនឡើងជាបន្តបន្ទាប់នេះ គិតចាប់តាំងពីឆ្នាំ២០១៦ រហូតមកដល់ខែសីហា ឆ្នាំ២០១៩ នេះ សកម្មភាពវិនិយោគតាមវិស័យដែលលេចធ្លោជាងគេ គឺវិស័យទេសចរណ៍មានប្រមាណជា ៤៧% វិស័យហេដ្ឋារចនាសម្ព័ន្ធមាន២៤% វិស័យឧស្សាហកម្មមាន២៣% និងវិស័យកសិឧស្សាហកម្មមានប្រមាណ ៦% នៃទំហំវិនិយោគ។
ជាមួយគ្នានេះ ក្នុងរយៈពេល៨ខែ ឆ្នាំ២០១៩ ចំនួនវិនិយោគក្នុងវិស័យឧស្សាហកម្មមានការកើនឡើងខ្លាំង ខណៈទុនវិនិយោគនៅក្នុងវិស័យទេសចរណ៍ក៏មានការកើនឡើងជាគំហុកផងដែរ ដែលមានអាត្រាប្រមាណជា ៩៤% បើប្រៀបធៀបនៅក្នុងរយៈពេលដូចគ្នានៅក្នុងឆ្នាំ២០១៨។ ដោយឡែកតួលេខវិនិយោគក្នុងវិស័យកសិកម្ម ឧស្សាហកម្ម និងវិស័យហេដ្ឋារចនាសម្ព័ន្ធផ្សេងៗទៀតមានការថយចុះ៕