តារាជើងចាស់ម្នាក់ ធ្លាក់ខ្លួនដល់ថ្នាក់លក់នំតាមចិញ្ចើមថ្នល់ទាំងយប់អធ្រាត្រ
- 2019-10-25 03:41:05
- ចំនួនមតិ 0 | ចំនួនចែករំលែក 0
តារាជើងចាស់ម្នាក់ ធ្លាក់ខ្លួនដល់ថ្នាក់លក់នំតាមចិញ្ចើមថ្នល់ទាំងយប់អធ្រាត្រ
ចន្លោះមិនឃើញ
អ្នកស្រី គង់ ប៊ុនសុន ហៅម៉ែស៊ុន តារាជើងចាស់ម្នាក់ ដែលប្រិយមិត្តនិយមបានឃើញការសម្ដែងអ្នកស្រី ជាតួម្ដាយអ្នកក្រ ក្នុងខ្សែភាពយន្តក៏ដូចជា វីដេអូខារ៉ាអូខេជាច្រើននោះ មិនមែនមានជីវភាពក្រីក្រតែក្នុងសាច់រឿងនោះឡើយ គឺជីវភាពនៅខាងក្រៅរាល់ថ្ងៃរបស់អ្នកស្រីគឺលំបាកលំបិនណាស់ ដោយក្រៅពីការសម្ដែង ត្រូវឆ្លៀតលក់នំ កាត់យប់កាត់អធ្រាត្រ ដើម្បីដោះស្រាវជីវភាព។
អ្នកស្រី គង់ ប៊ុនសុន បានថ្លែងទាំងសំដីមួយៗថា ជាង៣ខែមកនេះ ទីផ្សារសិល្បៈរបស់អ្នកស្រីធ្លាក់ចុះជាខ្លាំង គឺអត់មានផលិតកម្មណាហៅថតឡើយ ហេតុនេះអ្នកស្រីត្រូវតែឆ្លៀតដើរលក់នំ ដើម្បីបង់ថ្លៃឈ្នួលផ្ទះ ក៏ដូចជា ជីវភាពប្រចាំថ្ងៃ។ អ្នកស្រីបានលើក នំថង់ងួន នំបាត់ជី នំខ្ញី ជាដើម ពីអ្នកបោះដុំឯខេត្តកំពត ដោយក្នុង១ថង់ ចំណេញបានខ្ទង់៧០០រៀល ប៉ុណ្ណោះ។
ចាប់តាំងពីព្រឹក រហូតម៉ោង១២យប់ អ្នកស្រីថា អាចលក់បាន១០ទៅ ២០ កញ្ចប់ប៉ុណ្ណោះ ក្នុង១ថ្ងៃ ផាត់ប្រាក់ថ្លៃថង់ និង ម៉ូតូឌុប សល់ជាង១ម៉ឺនរៀល។ "លោកក្មួយអើយ១កញ្ចប់ថាចំណេញ១០០០រៀលចុះ តែយើងផាត់ម៉ូតូឌុប និង ថង់ច្រក អីចឹងអាចសល់៧០០អីទេ មានថ្ងៃខ្លះលក់ដល់ម៉ោង១២យប់ក៏មាន អត់ដាច់ទេ មិនទាំងរួចថ្លៃម៉ូតូឌុបផង ចេះប្រឹងទៅ ដើម្បីជីវិត "អ្នកស្រី គង់ ប៊ុនសុន លើកឡើង។
បច្ចុប្បន្នអ្នកស្រី គង់ ប៊ុនសុន ប្រកបរបរលក់នំនេះជាង១ឆ្នាំមកហើយ ដោយលក់នៅលើផ្លូវ២៧១ ក្រោយធនាគារANZ ។ ចំណែកថ្លៃផ្ទះជួល ស្ត្រីមេម៉ាយកូន៣វ័យ ៦៥រូបនេះ ជួលគេ១ខែ៩០ ដុល្លារ។ ងាកមកការថតភាពយន្តវិញ តម្លៃខ្លួនអ្នកស្រី មិនបានថ្លៃឡើយ ក្នុង១ថ្ងៃទទួលបានត្រឹមតែ១៥ ទៅ ៥០ ដុល្លារប៉ុណ្ណោះ។
ក្នុងវិស័យភាពយន្តតារាជើងចាស់មានកំណើតមកពីខេត្ត តាកែវ រូបនេះ បានថតមិនក្រោម៣០ទៅ ៤០រឿងឡើយ ចំណែកវីដេអូខារ៉ាអូខេ និងស្ប៉តពាណិជ្ជកម្ម ក៏អ្នកស្រីថត បានជាច្រើនផងដែរ។
ទោះបីជាចំណូលមិនបានប្រសើរ ពីការងារសិល្បៈក្ដី អ្នកស្រី គង់ ប៊ុនសុន នៅតែមិន រាថយលើអាជីពនេះឡើយ បច្ចុប្បន្នទទឹងចាំតែគេហៅថត គឺសប្បាយចិត្តណាស់ ត្បិតអីវា គឺជាការស្រលាញ់។ ប្រសិនបើប្រិយមិត្តចង់ជួយឧបត្ថម្ភ ឬក៏ផលិតកម្មណាមានបំណងហៅអ្នកស្រី ប៊ុនសុន ថត អាចទាក់ទងលេខទូរសព្ទ 098 444 858 ៕