គណបក្សហ៊្វុនស៊ិនប៉ិច-ខ្មែររួបរួមជាតិ​ នឹងធ្វេីសមាជច្របាច់បញ្ចូលគ្នា

  • 2019-10-28 02:26:30
  • ចំនួនមតិ 0 | ចំនួនចែករំលែក 0

ចន្លោះមិនឃើញ


គណបក្សហ៊្វុនស៊ិនប៉ិច​ និងគណបក្សខ្មែររួបរួមជាតិ​ នឹងធ្វើ​សមាជ​ច្របាច់​បញ្ចូល​គ្នា​ទៅ​ជាគណបក្ស​តែ​មួយ​ក្រោម​ដំបូលគណបក្សហ៊្វុនស៊ិនប៉ិច។ ការធ្វើ​សមាជ​គ្រោង​នឹង​ធ្វើ​នៅ​ក្នុង​ពេល​ឆាប់ៗ​ខាង​មុខ​នេះ​ គឺ​បន្ទាប់​ពី​ក្រុម​ការងារ​នៃ​គណបក្ស​ទាំង​ពីរ​ពិភាក្សា​រៀប​ចំរចនា​សម្ព័ន្ធ​បញ្ចូល​គ្នា​ជាធ្លុងមួយ​រួច​រាល់។ នេះបើ​យោងតាមប្រភពស្និទ្ធសម្តេចក្រុមព្រះ​ នរោត្តម​ រណឫទ្ធិ​ ថ្លែងប្រាប់ [ខ្លីៗ​] នៅព្រឹកថ្ងៃទី​២៨​ ខែតុលានេះ។

សម្តេចក្រុមព្រះ​ នរោត្តម​ រណឫទ្ធិ​ ប្រធាន​គណបក្ស​ហ៊្វុន​ស៊ិនប៉ិច
មន្ត្រី​ជាន់ខ្ពស់​គណបក្សហ៊្វុនស៊ិនប៉ិច​ បានបញ្ជាក់ថា​ ការ​បង្រួប​បង្រួម​រវាង​គណបក្ស​រាជានិយម​ទាំង​ពីរនេះ​ បានកើតឡើង​បន្ទាប់ពីជំនួបរវាងសម្តេចក្រុមព្រះ​ នរោត្តម​ រណឫទ្ធិ​ ប្រធាន​គណបក្ស​ហ៊្វុន​ស៊ិនប៉ិច​ ជាមួយ លោក​ញឹក​ ប៊ុនឆៃ​ ប្រធានគណបក្សខ្មែររួបរួមជាតិ​ចំនួនបីលើក​ គឺនៅថ្ងៃទី១៣-១៨-២៤​ ខែតុលា​ ឆ្នាំ២០១៩​ នៅដំណាក់វាលស្បូវ។ដោយ​នៅ​ក្នុង​ជំនួប​សម្តេច​ក្រុមព្រះ​មាន​គំនិត​ផ្តួច​ផ្ដើម​ឲ្យ​មាន​ការបង្រួបបង្រួមអ្នករាជានិយម​ និងអ្នកសីហនុ​និយមឡើងវិញ។

ហើយនៅពេលព្រះអង្គជួបជាមួយ លោក ញឹក​ ប៊ុនឆៃ​ គឺព្រះអង្គមានព្រះទ័យសប្បាយ​ និង​មាន​បន្ទូល​បានច្រើន។ ទាក់​ទងការបង្រួបបង្រួមនេះ​ លោកញឹក​ ប៊ុនឆៃ​ បានថ្លែងប្រាប់ [ខ្លី​ៗ] ថា​ លោក​សូម​គាំទ្រ​ និងដង្ហែតាមព្រះរាជតម្រិះរបស់សម្តេចក្រុមព្រះ​ នរោត្តម​ រណឫទ្ធិ​ ក្នុង​ការ​បង្រួប​បង្រួម​អ្នក​រាជា​និយម​ និងអ្នកសីហនុនិយម។

លោក ញឹក​ ប៊ុនឆៃ ប្រធានគណបក្សខ្មែររួបរួមជាតិ​

លោកបញ្ជាក់ថា «ការបង្រួបបង្រួមរវាងគណបក្សទាំងពីរ​ គឺ​មាន​ការ​ស្រុះ​ស្រួល​ឯកភាព​គ្នា​អស់​ហើយ​ នឹងអាចនឹងមានការជជែកពិភាក្សាគ្នាដើម្បីឈានទៅធ្វើសមាជនាពេលខាងមុខ​ ក្នុងការ​បង្រួប​បង្រួមគណបក្សហ៊្វុនស៊ិនប៉ិច​ និងគណ​បក្សខ្មែររួបរួមជាតិ​ ទៅជាគណបក្សតែមួយ​ ពោល​គឺក្រោមដំបូងគណបក្សហ៊្វុនស៊ិនប៉ិច»។ លោកញឹក​ ប៊ុនឆៃ​ បានអះអាងថា​ ការរួប​រួម​រវាង​គណបក្ស​ទាំង​ពីរ​ គឺមិនមានការបែងចែកកូតាទេ​ ដោយពិនិត្យទៅលើអ្នកស្មោះត្រង់ជាមួយគណបក្ស៕

អត្ថបទ៖ កុសល

អត្ថបទថ្មី
;