ថៃ សុខចិត្តជួលទីលានហ្វឹកហាត់ឯកជន លាក់ក្បួនមិនឱ្យវៀតណាមដឹង មុនប៉ះគ្នាយប់នេះ
- 2019-11-19 04:18:40
- ចំនួនមតិ 0 | ចំនួនចែករំលែក 0
ថៃ សុខចិត្តជួលទីលានហ្វឹកហាត់ឯកជន លាក់ក្បួនមិនឱ្យវៀតណាមដឹង មុនប៉ះគ្នាយប់នេះ
ចន្លោះមិនឃើញ
ក្រុមជម្រើសជាតិថៃ បានទៅដល់ក្រុងហាណូយ ប្រទេសវៀតណាម កាលពីថ្ងៃសៅរ៍កន្លងទៅ ដើម្បីត្រៀមប្រកួតជម្រុះ World Cup 2022 ពូលG នៅយប់នេះ។
ក្រោយពេលទៅដល់ ក្រុមជម្រើសជាតិថៃ ពុំបានហ្វឹកហាត់នៅលើទីលានដែលផ្តល់ឱ្យសហព័ន្ធកីឡាបាល់ទាត់វៀតណាម (VFF) ឡើយ ដោយសុខចិត្តជួលទីលានឯកជនពីក្លឹបបាល់ទាត់មួយ ធ្វើការហ្វឹកហាត់ជាឯកជន ព្រមទាំងបិទឱ្យមិនសារព័ត៌មានចូលបានឡើយ។
ថ្លែងក្នុងសន្និសីទកាសែតកាលពីម្សិលមិញ លោក Akira Nishino គ្រូបង្វឹកក្រុមជម្រើសជាតិថៃ បាននិយាយយ៉ាងដូច្នេះថា៖ «យើងអរគុណដល់ VFF សម្រាប់ការគាំទ្រ ប៉ុន្តែយើងត្រូវការឯកជនភាព ពីព្រោះយើងកំពុងធ្វើការផ្លាស់ប្តូរទាំងកីឡាករ និងយុទ្ធសាស្រ្ត»។
គ្រូសញ្ជាតិជប៉ុនរូបនេះបន្តថា វៀតណាម ជាក្រុមដែលមានការលូតលាស់លឿន និងអស្ចារ្យ ហើយជោគជ័យរបស់ក្រុមវៀតណាម ក៏ជាមេរៀនសម្រាប់ក្រុមថៃផងដែរ។
គួររំលឹកថា កាលពីជំនួបជើងទី១ នៅក្រុងបាងកក ថៃ បានប្រកួតស្មើវៀតណាម ០-០។ គិតត្រឹមជុំទី៤ វៀតណាម ឈរលើគេក្នុងពូលមាន ១០ពិន្ទុ, ថៃ លេខ២ មាន ៧ពិន្ទុ, អារ៉ាប់រួមលេខ៣ មាន ៦ពិន្ទុ, ម៉ាឡេស៊ីលេខ៤ មាន ៦ពិន្ទុ និងឥណ្ឌូណេស៊ីលេខ៥ មាន០ពិន្ទុ៕